“Mançester Siti” və “şəhərlilər”in baş məşqçisi Xosep Qvardiola tərəflər arasında yeni müqaviləni əsaslandırıblar.
Arena.az məlumat verir ki, İngiltərə nəhənginin idarə heyətinin sədri Xaldun Əl-Mübarək ispan mütəxəssislə müqavilə müddətinin uzadılması ilə bağlı klubun mövqeyini açıqlayıb:
“Mançester Siti”nin hər bir azarkeşi kimi mən də şadam ki, Qvardiolanın klubdakı səyahəti davam edəcək və onun fədakarlığı, həvəsi və yenilikçi düşüncəsi futbol mənzərəsini tərtib etməyə davam edəcək. Onun təkmilləşməyə və uğura olan hərisliyi səngimək bilmir, oyunçularımız və məşqçi heyətimiz, klub mədəniyyətimiz və ümumilikdə ingilis futbolu da bundan birbaşa faydalanacaqlar.
Müqavilənin müddətinin uzadılması Xosepə 10 ildən çox müddətə “Mançester Siti”də işləməyə imkan verəcək və məşqçilik rekordlarını yenidən yazmağa davam etmək imkanı təqdim edəcək”, – “şəhərlilər”in mətbuat xidməti Əl-Mübarəkdən sitat gətirir.
Öz növbəsində, Qvardila da “Mançester Siti” ilə yeni müqaviləyə imza atmasının səbəbini açıqlayıb:
“Mən niyə qaldım? Belə ki, mən indi ayrıla bilməyəcəyimi hiss etdim. Bu, çox sadədir. Səbəbini soruşmayın. Ola bilsin ki, dörd məğlubiyyət mənim, klubu tərk edə bilməyəcəyimi hiss etməyimə səbəb olub…”, deyə ispan mütəxəssis bildirib.
Xatırladaq ki, yenilənmiş müqaviləyə əsasən, Qvardiola 2027-ci ilin iyun ayının sonuna qədər “şəhərlilər”in sükanı arxasında fəaliyyətini davam etdirəcək.
Xatırladaq ki, Xosep Qvardiola 2016-cı ilin iyul ayından “Mançester Siti”ni çalışdırır. “Şəhərlilər” bu müddətdə “Pep”in rəhbərliyi altında 490 oyun keçiriblər, 360 qələbə qazanıblar, 60 heç-heçə ediblər, 70 məğlubiyyətə üzülüblər. Top fərqi isə 1239:446 nisbətindədir.
Bu müddətdə “Pep” “Mançester Siti”nin futbol tarixinin ən şanlı salnaməsini yaradıb. Qvardiola “şəhərlilər”ə 6 dəfə İngiltərə Premyer Liqasını, 2 dəfə İngiltərə Kubokunu, 4 dəfə İngiltərə Liqa Kubokunu, 3 dəfə İngiltərə Super Kubokunu, UEFA Çempionlar Liqasını, UEFA Super Kubokunu və FIFA Klub Dünya Kubokunu qazandırıb.
Xatırladaq ki, Xosep Qvardiola “Mançester Siti”dən öncə “Barselona” və “Bayern”i də uğurla çalışdıraraq, çoxlu qənimətlər qazandırıb.
11 turdan sonra Qvardiolanın “Mançester Siti”si 23 xalla İngiltərə Premyer Liqasının yarış cədvəlində 2-ci pillədə qərarlaşıb.
