“Fənərbaxça”nın baş məşqçisi Joze Mourinyo Türkiyə klubunun “Əl-Nəsr”in ulduzu Kristiano Ronaldo ilə maraqlanmasına münasibətini bildirib.
Arena.az “Fanatik” dərgisinə istinadən, portuqal mütəxəssisin bu barədə fikrini təqdim edir:
“Kristiano İstanbula yemək yeməyə gələ bilər, çünki şəhər Səudiyyə Ərəbistanı ilə Portuqaliyanın yarım mənzilliyindədir. Ronaldo köhnə dostu Joze Mourinyonu ziyarət etmək məqsədilə şəxsi təyyarəsinə də minə bilər. Onda biz mənim otelimdə yemək yeyə bilərik.
Onun “Fənərbaxça”da oynayacağını deyənlərə gəlincə, onlar ya yazdıqlarını anlamırlar, ya da yaydıqları gülünc xəbərlərdən məmnundurlar”, deyə Mourinyo vurğulayıb.
Daha əvvəl mətbuatda, Mourinyonun Ronaldoya şəxsən zəng edərək onu “Fənərbaxça”ya dəvət etməsi ilə bağlı məlumat yayılmışdı.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsinin müddəti 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 17 oyuna 13 qol və 3 məhsuldar ötürmə ilə fərqlənib.
Kristianonun “Əl-Nəsr” karyerası ümumilikdə 81 oyun, 71 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 215 oyuna 135 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
