Azərbaycanın COP29-a hazırlaşması ilə əlaqədar vaxt çox qısa idi. Əgər digər dövlətlər COP-a ev sahibliyi etmək üçün ən azı 2 il hazırlıq zamanları olurdusa, Azərbaycan cəmi 10-11 ay ərzində bu işi yekunlaşdırmalı idi.
Bu sözləri "Operativ Məlumat Mərkəzi-OMM"-ə açıqlamasında millət vəkili Naqif Həmzəyev dedi.
O qeyd etdi ki, Azərbaycan bu günə qədər keçirilmiş COP tədbirlərinin ən nümunəvisini təşkil etmiş oldu.
"Azərbaycana təşrif buyuran dünya liderləri, hökumət rəhbərləri, dini liderlər, ekspertlər, nazirlər, eko-aktivistlər, bir sözlə, Azərbaycana təşrif buyurmuş bütün şəxslər Azərbaycanda həm tədbirlərin yüksək səviyyədə təşkil edilməsindən, həm qonaqpərvərlikdən, həm də Azərbaycandan çox razı qaldılar. Hətta qonaqların böyük əksəriyyəti ümumiyyətlə getmək istəmirdilər. Mən inanıram ki, bu qonaqlar hələ gələcək illərdə də tez-tez Azərbaycana təşrif buyuracaqlar".
Deputat qeyd etdi ki, COP29 Azərbaycanın gələcək illərdə iqtisadiyyatına böyük bir töhfə olacaq.
"Bilirsiniz ki, məhz COP29-un qarşısında duran əsas vəzifələrdən birincisi məhz qlobal istiləşmənin qarşısını almaq və 1,5°C-dən yuxarı olmadan istiləşmənin səviyyəsini saxlamaq idi. Daha sonra isə məhz iqlim dəyişikliklərinə qarşı birgə mübarizəni təşkil etmək üçün maliyyə öhdəliklərinin razılaşdırılması idi ki, hər iki missiyanı COP29 həyata keçirə bildi və bu günə qədər biz bunun maliyyə tutumunun və maliyyə axtarışlarının hələ yekunlaşmadığını görürdük. Ancaq məhz Azərbaycanın prezidentliyi ilə bu mümkün oldu və biz inanırıq ki, məhz iqlim dəyişiklərinə qarşı artıq konkret maliyyə öhdəlikləri götürülüb və 300 milyard dollar civarındakı maliyyə bu proseslərə cəlb ediləcək. Ancaq gələcəkdə də əlavə maliyyə axtarışları həyata keçirilə bilər".
N.Həmzəyev bildirdi ki, Prezident İlham Əliyevin təbirincə desək, COP29 iqlim diplomatiyasında yeni bir səhifə açdı və nəhayət ki, dünya dövlətləri iqlim dəyişiklikləri ilə bağlı birgə səylərini birləşdirmək və konkret işlər görmək üçün razılığa gələ bildi.
"Azərbaycan və prezident İlham Əliyev çox ağır və çətin bir işin öhdəsindən gəlmiş oldu. Təzyiqlərin, haqsız qarayaxma kampaniyalarına baxmayaraq, Azərbaycan bu ağır yükün öhdəsindən gəlmiş oldu və biz bir daha sübut etdik ki, Azərbaycan haqq yolundadır. Azərbaycan qlobal aktorlarla bərabər qlobal problemlərin həllinə töhfə verə biləcək gücdədir və Azərbaycanın yaratdığı yeni reallıqlar fonunda Azərbaycan 30 il, 20 il bundan öncəki Azərbaycan deyil və Azərbaycanla, Azərbaycanın mövqeyi ilə barışmaq və Azərbaycanla dost olmaq digər dövlətlər üçün də daha faydalı olar və ümumiyyətlə bizim regionumuz üçün, dünya üçün birlik, həmrəylik və sülh çağırışları ən düzgün yanaşmadır və Azərbaycanın məhz COP29 ərəfəsində və COP29 zamanı irəli sürdüyü sülh çağırışları gələcək COP təşkilatçıları üçün də bir örnək olmalıdır və bu ənənə davam etdirilməlidir.
Eyni zamanda, Azərbaycanın qazandığı təcrübə və ortaya qoyduğu yeni yanaşmalar gələcək illərdə təşkil edəcək COP tədbirlərində də mütləq istifadə ediləcəkdir və Azərbaycan da öz təcrübəsini məmnuniyyətlə bu dövlətlərlə bölüşəcəkdir və biz inanırıq ki, Azərbaycanın əldə etdiyi uğurlar COP29-da qəbul edilmiş qərarlar uzun illər Bakı ilə Azərbaycanla bağlı olaraq xoş xatirə olaraq yad ediləcəkdir və hər zaman Azərbaycan dövlətinin xidmətləri və Azərbaycanın ev sahibliyi mütləq uğur kimi yada salınacaqdır", - deyə o sonlandırıb.
Mehman Mirzəzadə
