Son günlərdə rublun kəskin zəifləməsinin əsas səbəbləri ABŞ dollarının möhkəmlənməsi və Moskvaya qarşı sonuncu sanksiya raundu ilə bağlı bazar narahatlıqlarının artmasıdır.
Hurriyyet.az xəbər verir ki, bunu çərşənbə günü axşam Rusiya İqtisadiyyat naziri Maksim Reşetnikov bildirib.
"Hazırkı məzənnə zəifləməsi fundamental amillərlə bağlı deyil. Ticarət balansı sabitdir. Əsas zəifləmə səbəbləri dolların qlobal valyutalara qarşı möhkəmlənməsi və xarici iqtisadi fəaliyyət iştirakçılarının yeni sanksiyalar fonunda tərəfdaşlarla əməkdaşlıqla bağlı narahatlıqlarıdır", – deyə Reşetnikov Qazaxıstanda, Astana sammitinin kuluarlarında qeyd edib.
Nazir məzənnənin emosiyalar yatışdıqdan sonra stabilləşəcəyini bildirib.
Rubl bazarında son vəziyyət
Çərşənbə günü rubl, Qərb ilə Moskva arasında konfrontasiya və ixrac gəlirlərinin sanksiyalar səbəbindən qeyri-müəyyənliyi fonunda, valyutaya aqressiv tələblərin artması ilə yeni minimuma çatıb. Sanksiyalar xüsusilə Rusiya banklarına, o cümlədən Qazprombank-a qarşı sərtləşdirilib.
Mart 2022-ci ildən bəri ilk dəfə olaraq rubl çərşənbə günü Moskva birjasında 1 yuan üçün 15-16 rubl səviyyəsinə düşüb. Beynəlxalq bazarlarda isə dollar 114,50 rubl, avro isə 120,83 rubl həddinə çatıb.
Mərkəzi Bankın reaksiyası
Rublun dəyərdən düşməsi fonunda, çərşənbə axşamı axşam Rusiya Mərkəzi Bankı valyuta bazarındakı volatilliyi azaltmaq məqsədilə büdcə qaydaları çərçivəsində xarici valyuta alışını ilin sonuna qədər dayandırdığını elan edib.
"Bu cür vəziyyətlərdə adətən valyuta bazarında həddindən artıq emosional komponent müşahidə olunur. Təcrübə göstərir ki, yüksək volatillik dövründən sonra məzənnə həmişə stabilləşir", – deyə Reşetnikov vurğulayıb./Qaynarinfo/
