2025-ci ildə turistlər üçün dünyanın ən arzulanan ölkəsi olaraq Avstraliya seçilib. Avropada isə səyahətçilər arasında ən çox maraq doğuran ölkə İtaliya olub. Lakin İtaliya artıq turist axını ilə çətinliklə başa çıxır.
Qaynarinfo xəbər verir ki, bu nəticələr "Wanderlust" səyahət jurnalı tərəfindən keçirilən sorğu əsasında müəyyən edilib.
Sorğuda dünyanın müxtəlif yerlərindən 168 min səyahətçi iştirak edib. Tədqiqat müəlliflərinin qeyd etdiyinə görə, dörd il ərzində üçüncü dəfədir ki, iştirakçılar Avstraliyanı dünyanın ən arzulanan ölkəsi kimi seçirlər. Onlar, eyni zamanda, son illərdə aborigenlər tərəfindən təşkil edilən mədəni turların və tədbirlərin sayının kəskin artdığını vurğulayıblar.
"Onlar bu qədim torpağı görmək üçün yeni yollar açdılar: Sidney kimi simvolik şəhərlərin tarixini öyrənməkdən tutmuş, Şimali ərazinin qırmızı səhrasında 65 min illik mədəniyyətə qərq olmağa qədər. Səyahətçilər həmçinin Avstraliyanın ən ucqar guşələrini kəşf etmək üçün qərbə gedərək Ningaloo rifinin köpək balıqlarını, tısbağalarını və mantralarını tapmağa, vəhşi təbiətlə dolu Kenquru adası və ya Tazmaniyaya qaçaraq təbii mühitlərində gəzən simvolik canlılarla görüşməyə üstünlük verirlər", deyə hesabatda qeyd edilir.
Dünyanın turistlər üçün ən arzulanan 10 ölkəsi:
1. Avstraliya
2. Kanada
3. Yaponiya
4. ABŞ
5. Yeni Zelandiya
6. Kosta-Rika
7. Cənubi Afrika
8. Braziliya
9. Cənubi Koreya
10. Peru
Avropada isə qədim sərvətlərin və məşhur mətbəxin vətəni olan İtaliya "Wanderlust" oxucuları tərəfindən ən arzulanan ölkə seçilib.
"Tədqiqat müəllifləri Florensiya, Venesiya və Amalfi sahili kimi məşhur yerlərin turistləri cəlb etdiyini, lakin İtaliyanın əsl cazibəsinin daha az ziyarət edilən, UNESCO siyahısına daxil edilmiş abidələrdə və şəhərlərdə olduğunu bildirirlər", deyə araşdırmada vurğulanır.
Bunların arasında Bolonya (tarixi universiteti və məşhur pastası ilə), Avstro-Macarıstan rəngləri ilə fərqlənən Triest, həmçinin Apuliya bölgəsindəki ənənəvi Trullo evləri və Bazilikata bölgəsindəki qədim mağara şəhəri Matera tövsiyə edilir.
Avropanın turistlər üçün ən arzulanan 10 ölkəsi:
1. İtaliya
2. Xorvatiya
3. Fransa
4. İspaniya
5. Yunanıstan
6. Almaniya
7. Türkiyə
8. Avstriya
9. İslandiya
10. Portuqaliya
Sorğuya görə, səyahətçilər dünya üzrə ən çox Tokioda (Yaponiya), Avropada isə Madriddə (İspaniya) olmaq istəyirlər.
Aydın
