Gürcüstanın Baş naziri İrakli Kobaxidze paytaxt Tbilisidə keçirilən nümayişlərin dinc xarakter daşımadığını bəyan edib və fəalları zorakı davranış nümayiş etdirməkdə ittiham edib.
İrakli Kobaxidze hökumət binasında keçirdiyi mətbuat konfransında ölkədə baş verən prosesləri dəyərləndirib.
Hökumətin Avropa İttifaqına (Aİ) üzv olmaq üçün danışıqları dayandırmaq qərarına qarşı davam edən nümayişlərdə şiddətli hadisələrin yaşandığına diqqət çəkən Kobaxidze "Tbilisidəki nümayişlər dinc xarakter daşımır" deyib.
Fəalların dəfələrlə polisə və parlament binasına hücum etdiyini deyən Kobaxidze əsas müxalifət partiyası olan “Vahid Milli Hərəkat” partiyası və tərəfdarlarının 2014-cü ildə Ukraynada baş verən “meydan hadisələri”nə bənzər aksiya təşkil etməyə çalışdığını irəli sürərək, buna icazə verməyəcəklərini vurğulayıb.
Nümayişlər zamanı polisə və parlament binasına hücum edənlər arasında bir neçə rus və bir Britaniya vətəndaşının olduğunu bildirən Kobaxidze “Biz zorakılıq qrupları təşkil edən əcnəbi “təlimatçılar”la məşğul ola bilərik, amma mən proqnoz vermək istəmirəm, bu, bir araşdırma mövzusudur" deyib.
Ölkənin Aİ-yə inteqrasiyasının onlar üçün prioritet olduğuna işarə edən Kobaxidze “Gürcüstanın 2030-cu ilə qədər Avropa İttifaqında qəti iştirakı üçün hər cür səy göstərəcəyimizə söz veririk” dedi. dedi.
ABŞ Dövlət Departamentinin Tbilisidəki hadisələrə görə Gürcüstanla strateji əlaqələri dayandırmasına münasibət bildirən Kobaxidze bu qərarın müvəqqəti olduğunu iddia edib.
ABŞ-ın seçilmiş prezidenti Donald Trampla artıq əlaqə qurduqlarını qeyd edən Kobaxidze "Tramp nə deyirsə, olur, ona görə də bizim üçün ən vacib şey Donald Trampla münasibətimizdir" deyib.
Qeyd edək ki, noyabrın 28-də Gürcüstan hökumətinin Aİ-yə üzvlük danışıqlarını dayandırmaq qərarına qarşı başlayan nümayişlər dördüncü gününü keçirib.
Hökumətin qərarına reaksiya verən minlərlə insan gecə saatlarında yenidən parlament binası qarşısına toplaşıb.
Hökuməti istefaya çağıran və yeni parlament seçkilərinin keçirilməsini tələb edən nümayişçilər Gürcüstan və Avropa İttifaqının bayraqlarını daşıyıblar.
