Avropa İttifaqı Şurası Ukrayna Mexanizmi çərçivəsində 4,2 milyard avrodan artıq maliyyə yardımının ikinci tranşını təsdiqləyib.
Bakıvaxtı.az xəbər verir ki, bu barədə Aİ Şurasının mətbuat xidməti məlumat yayıb.
Bildirilib ki, Şura bu gün qəbul etdiyi qərarda Ukraynanın ayrılacaq vəsaitin alınması üçün Ukrayna Mexanizmində nəzərdə tutulan zəruri şərtləri və islahatları təmin etdiyi qənaətinə gəlib.
Şura həmçinin Ukraynadakı ağır fiskal vəziyyəti nəzərə alaraq pulun mümkün qədər tez ayrılmasının vacibliyini vurğulayıb.
Qeyd edək ki, 2024-cü il martın 1-də qüvvəyə minmiş Ukrayna Mexanizmi 2024-2027-ci illər üzrə Ukraynanın bərpası, yenidən qurulması və modernləşdirilməsini dəstəkləmək üçün qrant və kredit şəklində 50 milyard avroya qədər sabit maliyyələşdirməni nəzərdə tutur.
