“Bayern”in hücumçusu Tomas Müller Çempionlar Liqasının Liqa mərhələsinin 6-cı turunda “Şaxtyor”a qarşı keçirdikləri oyunu şərh edib.
Arena.az xəbər verir ki, Almaniya nəhəngi Donetsk təmsilçisi ilə səfər oyununda 5:1 hesablı möhtəşəm qələbəyə sevinib.
Alman veteran futbolçu matçdan sonra bunları söyləyib:
“Biz məmnunuq. “Bayern” təpki sayəsində rəqib qapı qarşısında çoxlu fürsətlər yaratdı. Biz daha çox qol vura bilərdik. Eyni ruhda davam etmək vacibdir. Rahatlaşmaq olmaz”, deyə Müller vurğulayıb.
Xatırladaq ki, Ukrayna klubu ilə səfər oyunu Müller üçün əlamətdar olub. O, komandasının əzmkar qələbəsinə vuduğu qolla töhfəsini verib. Beləliklə, Müller UEFA Çempionlar Liqasında ardıcıl 16-cı mövsümdə qolla fərqlənib. Bu nəticə ilə o, portuqal ulduz hücumçu Kristiano Ronaldonun və uelsli yarımmüdafiəçi Rayan Giqqzin nəticələrini təkrarlamış olub.
UEFA Çempionlar Liqasında yalnız argentinalı hücumçu Lionel Messi və fransalı hücumçu Kərim Benzema daha yüksək nəticə göstəriblər. Hər iki futbolçu 18 müxtəlif Çempionlar Liqası mövsümündə rəqib qapılarına qollarla yol tapıblar.
Tomas Müller “Bayern”in yetirməsidir. Veteran hücumçu 2000-ci ildən “Bayern”in düşərgəsindədir və 2009-cu ilin iyulundan Münhen klubunun əsas komandasında çıxış edir.
Müllerin “Bayern”lə müqaviləsi 2025-ci ilin iyun ayının sonuna qədər qüvvədədir.
Müller cari mövsümdə “Bayern” üçün bütün yarışlarda 20 oyun keçirib, 4 qol və 3 məhsuldar ötürmə ilə fərqlənib.
Ümumilikdə Müllerin “Bayern”in heyətində çıxışının mənzərəsi belədir: 727 oyun, 246 qol, 271 məhsuldar ötürmə.
Tomas Müller 2010-cu ilin martında debüt etdiyi Almaniya yığmasının heyətində 131 oyuna 45 qol və 41 məhsuldar ötürmə ilə fərqlənib.
Müllerin zəngin qənimətlər muzeyi var. Tomas “Bayern”lə 12 dəfə Bundesliqanın, 6 dəfə Almaniya Kubokunun, 8 dəfə Almaniya Super Kubokunun, 2 dəfə Çempionlar Liqasının, 2 dəfə UEFA Super Kubokunun, 2 dəfə FIFA Klub Dünya Kubokunun qalibi olub. Müller həmçinin 2 dəfə Almaniya Kubokunun (2009/2010 – 4 qol, 2013/2014 – 8 qol) ən sərrast futbolçusu olub. Veteran hücumçu həmçinin bundestimlə DÇ-1014-ün qalibi adını qazanıb.
“Transfermarkt” internet-portalı 35 yaşlı veteran hücumçunun transfer dəyərini 8 milyon avro məbləğində qiymətləndirir.
