“Arsenal”ın baş məşqçisi Mikel Arteta Çempionlar Liqasının Liqa mərhələsinin 6-cı turunda “Monako”ya qarşı keçirdikləri oyunu şərh edib.
Arena.az xəbər verir ki, İngiltərə nəhəngi doğma meydanda baş tutan bu oyunda 3:0 hesablı darmadağına sevinib.
“Topçular”ın ispan çalışdırıcısı matçdan sonra baş tutan mətbuat konfransında bunları söyləyib:
“Biz oyuna çox yaxşı başladıq, birinci hissədə məsələni nəticə ilə bağlamalıydıq, amma bunu bacarmadıq. Çempionlar Liqasında həmişə çətin anlar olur və biz onlardan qurtulub xilas olduq, amma ikinci qoldan sonra oyun artıq bizim nəzarətimizdə idi. Bu, çox yaxşıdır, xüsusən ona görə ki, qollar tamamilə fərqli idi. İstədiyimiz də məhz budur – oyunun hər mərhələsində təhlükənin ərsəyə gəlməsi. Biz daha da çox qol vura bilərdik, amma hər halda çox məmnunam”, deyə Arteta vurğulayıb.
6 oyundan 13 xal toplamış “Arsenal” Çempionlar Liqasının Liqa mərhələsinin yarış cədvəlində 3-cü pillədə qərarlaşıb. “Monako” isə 10 xalla 16-cı pillədədir.
