Donald Tramp ABŞ prezidentliyinə qayıdacağı təqdirdə Ukrayna hakimiyyətinin təhlükəsizlik zəmanətləri ilə bağlı müraciətlərini yerinə yetirməyəcək.
Musavat.com xəbər verir ki, bu barədə məlumatı "The New York Times" qəzeti yayıb.
Məlumata görə Trampın prioritetləri Asiya-Sakit Okean regionuna yönələcək, burada ABŞ Çin təsirinə qarşı daha fəal mübarizə aparmağı planlaşdırır.
Mənbələr bildirir ki, Tramp administrasiyası Ukraynaya hərbi və maliyyə dəstəyinin əsas yükünü Avropa ölkələrinin üzərinə qoymağı düşünür. Onun fikrincə, Avropa dövlətləri regional təhlükəsizliyin təmin olunmasında daha çox məsuliyyət daşımalıdır.
ABŞ-ın diqqətini Çinlə rəqabətə yönəltməsi, Ukrayna məsələsində Avropa İttifaqının daha aktiv iştirakını tələb edə bilər. Trampın bu mövqeyi, həm ABŞ daxilində, həm də Avropada müttəfiqlər arasında gərginliyə səbəb ola bilər.
Ekspertlərə görə Trampın bu planı Ukraynaya dəstəyin azalması və münaqişənin həlli üçün daha uzunmüddətli diplomatik danışıqlara ehtiyac yaradacağı ehtimalını gücləndirir. Bununla yanaşı, Avropa dövlətlərinin Ukraynaya dəstəkdə liderlik rolu alması ehtimalı artır.
