Bakı, 16 dekabr, AZƏRTAC
M.Füzuli irsinin dərin fəlsəfi məqamları və nəsildən-nəslə ötürülən əbədi sədaqət nümunəsi kimi əhəmiyyəti son dərəcə böyükdür. Dahi şairin irsi yalnız ədəbi müstəvidə deyil, həm də fəlsəfi dərinliyi ilə insanların həyat yoluna işıq salır. Onun əsərlərindəki eşq, sədaqət və insanın daxili dünyasının izahı müasir dövrdə də aktuallığını qoruyur. Məhz bu baxımdan onun yaradıcılığı bugünkü cəmiyyətin mənəvi-əxlaqi dəyərlərinin formalaşmasında müstəsna rol oynayır.
AZƏRTAC xəbər verir ki, bu fikirləri Xəzər Universitetinin Dillər və Ədəbiyyat Departamentinin müəllimi, “Ədəbiyyat səyyahları” saytının baş redaktoru Qardaşxan Əzizxanlı jurnalistlərə açıqlamasında söyləyib.
O bildirib ki, bu gün Məhəmməd Füzuli yaradıcılığının 530 illiyinə həsr olunmuş tədbir və mövzu ilə bağlı müsabiqənin mükafatlandırma mərasimi keçirildi: “Böyük şairin yaradıcılığı müxtəlif fəlsəfi müstəvilərdə davam edir, bu irs bəşəriyyət üçün daimi mənəvi dəyər daşıyır. M.Füzuli irsinin tədqiqi və təbliği istiqamətində keçirilən müsabiqələr və tədbirlər nəticədə yeni istedadların üzə çıxmasına dəstək olur. M.Füzuli irsinin gələcək nəsillərə ötürülməsi vacib amildir. Bu irs Azərbaycan ədəbiyyatının qızıl xəzinəsinin bir parçasıdır”, - deyə Q.Əzizxanlı əlavə edib.
