AZ

"Həm Fransa, həm də Qərb Cənubi Qafqazı itirdi" - Müşfiq Cəfərov

“Gürcüstanda parlament seçkilərinin ardınca prezident seçkilərinin də hakim "Gürcü Arzusu - Demokratik Gürcüstan" Partiyasının inamlı qələbəsi ilə başa çatması Qərbin və Fransanın Gürcüstanda süni şəkildə hakimiyyət böhranı yaratmaqla Cənubi Qafqazda destabilizasiyaya nail olmaq planlarını iflasa uğratdı”. 

 

Pravda.az xəbər verir ki, bunu Milli Məclisin deputatı Müşfiq Cəfərov deyib. 

 

“Qərb faktiki olaraq Gürcüstan əhalisini şantaj etməklə məşğul idi.  Avropa İttifaqının viza ilə bağlı məsələyə dair bəyanat verməsi, xalq parlament seçkilərinin yekunu olaraq müxalifətə səs verməsi, Aİ gürcü vətəndaşları üçün viza rejimi tətbiq edəcəyini elan etməsi, eləcə də Gürcüstana göstərilən yardımların kəsilməsi ilə bağlı verilən qərar da, əlbəttə ki, seçkilərdən əvvəl cəmiyyətin əhval-ruhiyyəsinə təsir etməyi hədəfləmişdi. Son günlər baş verən hadisələr bir daha göstərdi ki, Gürcüstan cəmiyyətində də xarici siyasətlə bağlı ciddi parçalanma var. Belə ki, Gürcüstanın yeni hakimiyyəti əhaliyə ərazi bütövlüyü və işğal olunmuş ərazilərin qaytarılmasını vəd edir. Eyni zamanda Avropa inteqrasiyasına yox demir. Ancaq Qərb, xüsusilə Fransa gürcü cəmiyyətinə diqtə edir ki, bu, Gürcüstanın yenidən Rusiyanın tabeçiliyinə qayıtmasıdır. Cənubi Qafqaz regionu və Azərbaycan üçün sadiq Gürcüstan daha vacibdir. Buna görə Gürcüstanda siyasi vəziyyətin gərginləşməsi haqlı olaraq region ölkələrini narahat edir. Bu amilləri nəzərə alaraq, bütün regionun diqqətinin Gürcüstana cəlb olunması da normaldır. Düzdür, Fransa  mediası aksiyaların hələ də şiddətlə davam etdiyini yazır, insanları bu aksiyalara cəlb etmək üçün təşviqat aparır, köhnə çəkilişləri yenidən paylaşaraq izdiham effekti yaratmağa çalışır. Amma reallıq budur ki, epizodik halları nəzərə almasaq, Gürcüstanda nisbi sakitlik yaranıb. Ən əsası, parlament binası qarşısındakı aksiyalar səngiyib. Reallıq budur ki, həm Fransa, həm də Qərb Cənubi Qafqazı itirdi. Regiondakı əsas aktorlardan olan Azərbaycan və Gürcüstan bu qüvvələrin məqsədlərinə görə milli maraqlarını qurban vermədi, müstəqil xarici və daxili siyasətlərini davam etdirməkdə prinsipal mövqe nümayiş etdirdi”, - deputat bildirib. 

Tarix: 17 Dekabr 2024, 13:59   
Seçilən
10
1
pravda.az

2Mənbələr