Bakı, 17 dekabr, AZƏRTAC
“Azərkosmos”un KOSMİK Akademiyasının təşkilatçılığı, Məktəbəqədər və Ümumi Təhsil üzrə Dövlət Agentliyinin və Azərbaycan Respublikası Təhsil İnstitutunun dəstəyi ilə Beynəlxalq Kosmik Poster Müsabiqəsinin milli mərhələsinin mükafatlandırma mərasimi keçirilib.
“Azərkosmos”dan AZƏRTAC-a bildirilib ki, tədbir çərçivəsində əldə edilmiş nailiyyətlər təqdim edilib, həmçinin məktəblilər təəssüratlarını paylaşıblar. Mərasimin sonunda məktəbdənkənar təhsil müəssisələrinin rəhbərlərinə təşəkkürnamələr təqdim olunub. Müsabiqə iştirakçısı olan məktəblilərə isə hədiyyələr, mükafatlar və sertifikatlar verilib.
Beynəlxalq Kosmik Poster Müsabiqəsi hər il Asiya-Sakit Okean Regionu (APRSAF) ölkələrindən və əməkdaş-assosiativ üzv ölkələrdən üç mərhələ üzrə 4000-dən çox 5-9-cu sinif şagirdlərini bir araya gətirir. Bu il keçirilən müsabiqənin milli mərhələsi Azərbaycanın Elm və Təhsil Nazirliyi və KOSMİK Akademiyanın birgə əməkdaşlığı ilə təşkil olunub. Açılış və bağlanış mərasimləri, onlayn plenar sessiyalar, seminar, mühazirə, dəyirmi masa, master klasslar və ən əsası posterlərin təqdimatından ibarət sərginin keçirildiyi müsabiqənin milli mərhələsi Azərbaycanda 2024-2025-ci tədris ilinin oktyabr ayında baş tutub.
Müsabiqənin milli mərhələsində ümumi təhsil müəssisələrinin 25 məktəblisi “Kosmik səyahət” mövzusunda rəsm əsərləri təqdim ediblər. Bu mərhələnin qalibi olan 3 məktəbli APRSAF-nin 30-cu sessiyası çərçivəsində Avstraliyanın Pers şəhərində təşkil olunmuş sərgidə beynəlxalq mərhələdə yüksək mükafatlara layiq görülüblər. Ümumi 33 iştirakçı arasında Azərbaycan məktəbliləri üç yüksək mükafata (“Ən yaxşı rəsm əsəri” mükafatı, “Xüsusi rəsm əsəri” mükafatı və Avstraliya Kosmik Agentliyi tərəfindən təqdim olunan mükafat) layiq görülərək təltif olunublar.
Müsabiqədə ümumilikdə 1712 məktəbli iştirak edib, 1462 rəsm əsəri təqdim olunub. Sərgidə 42 əsər nümayiş olunub və qaliblərə ümumilikdə 5 mükafat təqdim olunub. Bu mükafatların 3-ü Azərbaycan məktəblilərinə təqdim edilib.
