Dekabrın 15-18-də AMEA Nizami Gəncəvi adına Ədəbiyyat İnstitutunun təşkilatçılığı ilə \"Asiya xalqları ədəbiyyatı; ənənələr və müasir tendensiyalar” adlı beynəlxalq elmi konfrans keçirilib.
Konfrans və onun nəticələri ilə bağlı İnstitutun Azərbaycan-Asiya ədəbi əlaqələri şöbəsinin müdiri, filologiya elmləri doktoru, professor Bədirxan Əhmədli fikirlərini AZXEBER.COM-a bildirib:
\"Artıq konfrans başa çatdığından onun haqqında müəyyən fikir yürütmək olar. Deyim ki, təəssüratlar gözlədiyimizdən də yuxarıdır. Təsəvvür edin, ilk dəfə Asiya ədəbiyyatına həsr edilmiş elmi simpozium keçirilir və dünyanın müxtəlif yerlərindən gəlmiş alimlər müzakirəyə qoşulur. Biz bu konfransa ilin əvvəlindən hazırlaşırdıq. Olduqca mühüm, verimli bir elmi toplantı oldu.
Asiya ölkələrindən 20-ə qədər məruzələr edildi. Ümumilikdə edilən 50 məruzədə Asiya ədəbiyyatının müxtəlif problemləri, şəxsiyyətləri, ədəbi inkişaf təmayülləri ələ alındı. Eləcə də müqayisəli ədəbiyyatşünaslıq kontekstində xeyli məruzələr vardı. Deyim ki, müqayisəli ədəbiyyatşünaslığa son illərdə böyük əhəmiyyət verilir. Biz də buna üstünlük verdik. İndiyədək aparılan araşdırmalarda Avropa və Amerika ədəbiyyatına daha çox üstünlük verilirdisə, Azərbaycan-Asiya ədəbi əlaqələri şöbəsinin açılmasından sonra Asiya ədəbiyyatı ağırlıq təşkil etməyə başladı. Elə dünya bədii düşüncəsində də Asiya ədəbiyyatı önə çıxmaqdadır. Son illərdə siya ədəbiyyatının bir neçə nümayəndəsi Nobel mükafatına layiq görülüb. Artıq hind, yapon, çin, korey ədəbiyyatının görkəmli nümayəndələri bu mükafata layiq görülüb.
Konfransda Çin, Yaponiya, Koreya, İndoneziya, Hind, Pakistan, Vyetnam, Qazax, Türk, Azərbaycan, Qırğız, Özbək, Malay ədəbiyyatından edilən məruzələr böyük maraq doğurdu. AMEA-nın prezidenti, akademik İsa Həbibbəylinin təşkilatçılığı ilə keçirilən konfransa dünyanın müxtəlif ölkələrindən görkəmli alimlər dəvət olunmuşdu. Asiya Elmlər Akademniyası və Cəmiyyətlər Assosiasiyasının prezidenti Əhməd Nuri Yurdisev, Pakistan Ədəbiyyat Akademiyasının prezidenti Nəcibə Arif, Cənubi Koreyanın Seul Milli Universitetinin professoru Bang Min-Ho, Vyetnam Hanoy Universitetinin professoru Nquyen Van Çhien, Çin Sosial Elmlər Akademiyasının Ədəbiyyat tədqiqatları İnstitutunun direktor əvəzi, professor Lu Yusong, həmin Universitetin professoru Huang Xiangi, Fərqanə Dövlət Universitetinin ədəbiyyatşünaslı kafedrasının müdiri Mənzurə Jurayeva, Qazaxıstanın Abay Milli Pedaqoji Universitetinin müəllimi Janakul Sametova, Hindistanın Camiə Milli Universitetinin dosenti Nouşad bəy, Özbəkistan Milli Elmlər Akademiyasının Özbək dili, ədəbiyyatı və folkloru İnstitutunun böyük elmi işçisi Gülnaz Səttarova, Latviya Universiteti Asiyaşünaslıq departamentinin müdiri Kaspars Klavis, eləcə də 20-ə qədər xarici qonaqlar qatıldı və məruzələr etdilər.
