Rostov vilayətinin hakimiyyət orqanları mobil internet və rabitənin fəaliyyətinə məhdudiyyətlər qoyub.
Azpost.info bildirir ki, bu barədə “Bura Rostovdur” sosial səhifəsi xəbər verir. Qərar Ukrayna qüvvələrinin regionda yerləşən Novoşaxtinski neft emalı zavoduna (NEZ) və Kamenski kimya zavoduna hücumları fonunda qəbul edilib.
Telekommunikasiya operatorlarından biri izah edib ki, məhdudiyyətlər təhlükəsizliyi təmin etmək üçün tətbiq edilib. “Rabitə xidmətləri təhlükəsizliyi təmin etmək üçün regional hakimiyyət orqanlarının qərarı ilə müvəqqəti olaraq məhdudiyyətlərlə fəaliyyət göstərə bilər. Bu, ev interneti və televiziyasına təsir etməyəcək” .
Digər operator aydınlaşdırıb ki, 3G və 4G şəbəkələrində sürəti azaltmaq mümkün olan məhdudiyyətlər gecə saat 00:00-dan 5:00-dək qüvvədə olacaq.
Məhdudiyyətlər Ukrayna Silahlı Qüvvələrinin Rostov vilayətində mühüm infrastruktur obyektlərinə hücumundan sonra baş verib. Dekabrın 19-da Ukrayna qüvvələri 30-dan çox pilotsuz təyyarə və üç raketdən istifadə etməklə kütləvi zərbə endirib. Nəticədə Rusiyanın cənubundakı ən böyük neft emalı zavodunda yanğın baş verib. Şirkət hər iki ilkin neft emalı qurğusunun fəaliyyətini dayandırmağa məcbur olub.
Dekabrın 18-də Kamenski Kimya Zavodu raketlə hücuma məruz qalıb. Rusiya Müdafiə Nazirliyinin məlumatına görə, zərbə nəticəsində “zavodun ərazisindəki texniki struktur” zədələnib. Bu müəssisə Rusiyanın cənub bölgəsindəki ən böyük kimya istehsalı müəssisələrindən biridir.
