“Liverpul”un kapitanı Vircil van Deyk “qırmızılar”ın cari mövsüm İngiltərə Premyer Liqasının favoriti olub-olmadığına dair sualı cavablayıb.
Arena.az niderlandlı mərkəz müdafiəçisinin bu barədə cavabını təqdim edir:
“Bizim artıq oxşar təcrübəmiz var, iki dəfə qənimətə yaxın idik və çox kiçik fərqlə onu əldən verdik. Biz bu mövsüm qəniməti qazanmaq istəyirik, amma bunun nə qədər çətin olduğunu da bilirik”, deyə Van Deyk vurğulayıb.
Xatırladaq ki, Vircil van Deyk 2018-ci ilin yanvarından “Liverpul”da çıxış edir. “Qırmızılar” Van Deyki o vaxt 84,65 milyon avro məbləğ müqabilində “Sauthempton”dan transfer ediblər. Van Deykin klubla müqaviləsi 2025-ci ilin iyun ayının sonuna qədər qüvvədədir.
Cari mövsümdə Van Deyk “Liverpul”un heyətində bütün yarışlarda 22 oyuna çıxıb, 2 qol vurub, 1 məhsuldar ötürmə verib.
Niderlandlı müdafiəçinin mersisaydlıların heyətində çıxışının ümumi mənzərəsi isə belədir: 292 oyun, 25 qol, 13 məhsuldar ötürmə.
Van Deyk “Liverpul”la İngiltərə Premyer Liqasını (2020), İngiltərə Kubokunu (2022), İngiltərə Liqa Kubokunu (2022, 2024), İngiltərə Super Kubokunu (2023), Çempionlar Liqasını (2018/2019), UEFA Super Kubokunu (2019/2020), FIFA Klub Dünya Kubokunu (2019) qazanıb. Vircil həmçinin “Liverpul”un oyunçusu kimi 2018/2019-cu illər mövsümündə ilin oyunçusu mükafatına və həmçinin həmin mövsümdə UEFA-ya görə Avropanın ən yaxşı oyunçusu mükafatına layiq görülüb.
Vircil Van Deyk hazırda kapitanı olduğu, 2015-ci ilin oktyabrında debüt etdiyi Niderland yığmasının heyətində 78 oyuna çıxıb, 9 qol vurub.
“Transfermarkt” internet-portalı 33 yaşlı niderlandlı müdafiəçinin transfer dəyərini 28 milyon avro məbləğində qiymətləndirir.
