“Liverpul”un qapıçılar üzrə keçmiş məşqçisi Con Axterberq “İnter Mayami” və Argentina yığmasının ulduz hücumçusu Lionel Messi haqda danışıb.
Arena.az “Anfield Watch” dərgisinə istinadən məlumat verir ki, Axterberq argentinalı ulduzu təkəbbürdə ittiham edib:
“Mənə elə gəlir ki, o, bəzən təkəbbürlüdür, odur ki, bu, mənim xoşuma gəlmir. Mən onun futbol bacarığını sevirəm, amma biz onunla oynayanda o, lənətə gəlmişcəsinə dalırdı. Cərimə zərbəsi qazandı, sonra isə qol vurdu. Oyun zamanı Robertsonun onu təpələməsi çox xoşuma gəlmişdi”, deyə Con Axterberq təbəssümlə bildirib.
Əlavə edək ki, Messinin təkəbbürdə ittiham edilməsi ilk hal deyil. “Leo” bu yaxınlarda Argentina yığmasının düşərgəsində Fransa yığmasının qaradərili oyunçularının ünvanına biədəb irqi məzmunlu nəğmə oxunmasından sonra, “albiseleste”nin kapitanı olaraq bu biabırçılığı susqunluqla qarşılamısı ilə ictimai qınağa səbəb olmuşdu.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Buna qədər Messi yalnız “Barselona” və PSJ-də çıxış edib.
Argentinalı ulduz cari mövsümdə “İnter Mayami”nin heyətində bütün yarışlarda 15 oyuna çıxıb, 14 qol vurub və 11 məhsuldar ötürmə verib. Təcrübəli futbolçunun “İnter Mayami” karyerası ümumilikdə 29 oyun, 25 qol və 16 məhsuldar ötürmədən ibarətdir.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 187 oyun keçirib, 109 qol vurub və 58 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının gümüş (2014), Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
“Transfermarkt” internet-portalı 37 yaşlı Lionel Messinin transfer dəyərini 30 milyon avro məbləğində qiymətləndirir.
