Aqşin Yeniseydən şer...
Boş bir dünya düşüb şeytan bəxtinə
Qəlbinə girməyə həmdəmin yoxdu.
Rast gəldin tarixin Tufan vaxtına
Nuhsan, suların var, bir gəmin yoxdu.
Atdı torpaq səni, tutdu qum səni
Qovdu səhralarda bir səmum səni
Özünə qazdırdı bu uçrum səni
Yıxıldın gördün ki, dib, zəmin yoxdu.
Seyr et üfüqlərdə arzularını
Çırpma saçlarından əcəl qarını
Qucaqla qan daman şaqqalarını
Baxıb deməsinlər dözümün yoxdu.
Söylə son nitqini, ya son kəlməni
Səbri yox kimsənin gözləsin səni
Necə oxuyasan bu son nəğməni?
Bir sazın, bir pərdən, bir simin yoxdu.
Meşə pafosudu dünyanın varı
Ac qal, içindəki heyvandan arın!
Bir ömür düşün ki, qarğabazarı
Bir vətən düşün ki, heç kimin yoxdu.
Aqşin Yenisey
visiontv.az
