1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Yaponiyanın Yamaquçi bölgəsində aparılan yeni araşdırma zamanı yarasalarda müxtəlif DNT və RNT səviyyəli viruslar aşkarlanıb.
Bu barədə Oxu.Az "Haber Global"a istinadən xəbər verir.
Məlumata görə, 130-dan çox yarasa üzərində aparılan tədqiqatlar nəticəsində yarasaların 60 faizindən çoxunun zoonotik viruslar (heyvanlardan insanlara keçə bilən) da daxil olmaqla, ən azı bir virusa yoluxduğu müəyyən edilib.
Araşdırmada xüsusilə adenovirus və astrovirus kimi bəzi virusların genetik olaraq sürətlə təkamül etdiyi müşahidə edilib.
Həmçinin Yaponiyada daha əvvəl müəyyən edilməmiş 10 yeni Herpes virusu növü aşkarlanıb.
Tədqiqat zamanı tapılan bəzi virusların Çin və Koreyadakı viruslarla genetik oxşarlıqda olması Yaponiyadakı yarasaların bölgədəki digər yarasalarla təmasda ola biləcəyi fikrini yaradıb.
Bununla yanaşı, araşdırma nəticəsində yarasaların 36 faizinin birdən çox virusa yoluxduğu məlum olub ki, bu da yapon yarasalarının zoonotik epidemiyalara səbəb olma potensialını artırır.
Mütəxəssislərin sözlərinə görə, bu virusların həyat sikllərini və patoloji təsirlərini yaxşı başa düşmək üçün daha çox araşdırmaya ehtiyac var.
Yaponiya və ətraf bölgələrdə yarasalardan insanlara keçə biləcək xəstəliklərin qarşısını almaq üçün müntəzəm müayinə və monitorinq işlərinin artırılması tövsiyə olunur.
Yaponiyadakı yarasalarda yüksək nisbətdə aşkar edilən viruslar gələcəkdə zoonotik epidemiyalarla bağlı narahatlıqları artırır.
Bu tədqiqat zoonotik xəstəliklərin qarşısının alınması və ictimai sağlamlıq risklərinin azaldılması məqsədilə virusla mübarizə aparılması üzrə araşdırmaların vacibliyini bir daha ortaya qoyur.
