Bu həftə üçün Gürcüstanın siyasi həyatında əsas hadisənin bazar günü müxalifətin keçirdiyi mitinq və onun nətcəsi olacağı gözlənilirdi. Lakin müxaliflərin bütün planları “Gürcü Arzusu”nun banisi Bidzina İvanişvili tərəfindən puça çıxarıldı və o, Avropa ittifaqının yüksək rütbəli məmurlarından birinin rəsmi Tiflisi Rusiyaya hücuma necə razı salmağa çalışması barədə danışmağa qərar verdi.
İvanişvili “İmedi” telekanalına müsahibəsində bildirib: “Mən keçmiş baş nazir İrakli Qaribaşvilinin mənə dediklərini xatırlayıram. Onunla Qərb ölkələrindən birinin yüksək rütbəli məmuru danışırdı. İrakli soruşdu: “Bəli, amma Rusiya ilə neçə gün döyüşə biləcəyimizi təsəvvür edirsiniz? Neçə gün davam edəcəyik? Ona cavab verdilər: üç-dörd gün. O dedi: “Bəs bu üç-dörd günə görə bizi məhv edirsən?” Ona cavab verdilər: “Deməli, 3-4 milyon nəfərsiniz, üç-dörd gündə hamını öldürməyəcəklər. Sonra meşədə partizan hərəkatına başlaya bilərsiniz. Biz sizə kömək edəcəyik, siz isə oradan döyüşəcəksiniz”. Eyni zamanda, “Gürcü Arzusu”nun yaradıcısının fikrincə, əgər İrakli Qaribaşvili müharibəni qızışdırmaqdan imtina edibsə, deməli, onun sələfi Giorgi Qaxariya bunu sadəcə olaraq istəyib: “O bilirdi ki, “Gürcü Arzusu” döyüşməyəcək, bunu bilirdi və birtəhər “Gürcü Arzusu”nun qarşısını almaq istəyirdi... Bu alçaq Qaxariyanı və onun yanında duranları, əlbəttə, onları mühakimə etmək lazım gələcək. Təbii ki, biz onun nə etdiyini, niyə bunu etdiyini, “Vahid Milli Hərəkat”a rəhbərlik etməyə necə kömək etdiyini sübut edəcəyik”. İvanişvili iddia edir ki, artıq bütün lazımi sənədləri hazırlayıb, onların köməyi ilə keçmiş baş naziri və onun tərəfdarlarını “ciddi cəzalandıra” biləcək, çünki onların əksəriyyəti parlamentə “Gürcü Arzusu”nun üzvü kimi daxil olub: “Mən onlara daha çox qəzəbliyəm”. Amma bunlar fonunda İvanişvili Avropa İttifaqından incimir. O əmindir ki, avropalılarla münasibətlərdəki hazırkı böhran Rusiya və Ukrayna arasındakı düşmənçiliklə bağlıdır. Beləliklə, onun nöqteyi-nəzərindən, sadəcə olaraq Ukraynadakı müharibənin tamamlanmasını gözləmək lazımdır və Brüssel qəzəbini mərhəmətə dəyişəcək. Avropa İttifaqının Gürcüstandakı səfiri Pavel Qerçinski bildirib ki, Avropa İttifaqı “tarixdə ən uğurlu və sülhpərvər layihədir”. Diplomat həmçinin əmin edib ki, Brüssel sabitlik, inkişaf və rifahın tərəfdarıdır: “Biz Gürcüstanın ailəmizin üzvü olmasını istəyirik, onunla birgə gələcəyimizi qərarlaşdırmaq istəyirik. İndi gürcülər qərar verməlidirlər ki, bizə qoşulmaq istəyirlər, ya yox. Ümid edirəm ki, Gürcüstan bu fürsəti əldən verməyəcək”. Bu arada Almaniya, Fransa, Polşa, Belçika, Danimarka, Estoniya, Latviya, Litva, Lüksemburq, Portuqaliya, Finlandiya, İsveç və Çexiyanın xarici işlər nazirləri birgə bəyanat yayaraq gürcülərin gələcəyini seçmək hüququndan məhrum olmaq üzrə olduqlarını iddia ediblər. Müraciətdə qeyd edildiyi kimi, Gürcüstan “xarici agentlər haqqında” qanunun qəbulundan sonra Avropa yolundan sapıb və bu, onun Avropaya inteqrasiyasının faktiki olaraq dayandırılmasına gətirib çıxarıb.
Gürcü politoloqu Nika Çitadze hesab edir ki, İvanişvilinin açıqlamaları sensasiya sayıla bilər: “Əvvəla, Rusiyaya hücum etmək nə deməkdir? Bir neçə gün ərzində Tiflis üçün hər şeyin çox pis bitəcəyi aydındırsa, bunu kim və niyə edəcək. Bundan başqa, gürcülər hökumət çağırsa belə, niyə müharibəyə razı olmalıdır? Əgər söhbət Rusiyanı hücuma təhrik etməkdən gedirsə, o zaman Moskvanın ikinci cəbhə açmaq niyyəti yoxdur”. Rus ekspert Vadim Muxanov hesab edir ki, İvanişvili kalibrlənmiş seçki kampaniyası aparır və bu kampaniyada o, müntəzəm olaraq vurğulayır: “Gürcü Arzusu” sabitliyin qalasıdır, onun əleyhdarları isə müharibənin qızışdırıcısıdır. Bu müsahibə onun əvvəlki bəyanatlarının bariz nümunəsi olmaq üçün nəzərdə tutulmuşdu və bu missiyada uğur qazandı. Eyni şey, dağıdılmış Ukrayna yaşayış məntəqələrini və dinc Gürcüstan şəhərlərini əks etdirən çoxsaylı seçki plakatlarına da aiddir”. Eyni zamanda ekspertlər hesab edirlər ki, İvanişvilinin çıxışı parlament seçkilərinin nəticələrinə ciddi təsir göstərəcək. Sosioloqların fikrincə, “Gürcü Arzusu” seçki yarışında favoritdir. Bəlkə də səsvermənin özü ona tam qələbə gətirməyəcək, lakin buna mandatların bölüşdürülməsi zamanı nail olmaq olar. Məsələn, Qaxariyanın “Gürcüstan naminə” partiyası seçki baryerini keçə bilməsə, onun səsləri “Gürcü Arzusu” hesabına keçə bilər. Qərbi də qorxudan budur. Ekspert David Şerazadaşvili bu fonda qeyd edir: “Bu gün Rusiya - Ukrayna müharibəsinin acı nəticələrini görürük. Bizi maraqlandıran yalnız sülhdür və kənardan, eləcə də müxalif qüvvələrin təsirinə yol verməməliyik. Biz ailə dəyərlərimizə zidd olan LGBT və digər buna bənzər ünsürləri, onların nümayiş etdirdiyi həyatı tanıya bilmərik. Bizim öz əxlaq və milli mental dəyərlərimiz var. Avropa İttifaqı, ABŞ və digər qüvvələrin təzyiq və təqiblərinə baxmayaraq, bu dəyərlərə qiymət verən gürcü xalqı mənfi ünsürlərə qarşı öz sözünü deyəcək”. Ölkəsinin regional əməkdaşlıq və mehriban qonşuluq siyasətinə toxunan siyasətçi bildirib: “Bizim bütün ölkələrlə yaxın dostluq münasibətlərimiz var. Qonşu və dost Azərbaycan xalqı və dövləti ilə əlaqələrimiz isə bir qədər fərqlidir. Bizi, eyni zamanda, strateji tərəfdaşıq. Əlaqələrimiz başqa ölkələr üçün də nümunədir. Hökumət və dövlət başçılarımızın həyata keçirdikləri məqsədyönlü siyasət nəticəsində birliyimiz və qardaşlığımız daha da möhkəmlənib. Hər iki ölkənin inkişafı üçün fikirlərimiz, mövqelərimiz eynidir. Biz birlikdə regionda da əminamanlığı qorumalıyıq”.
Tahir TAĞIYEV
