Portuqal mütəxəssis Ruben Amorim İngiltərə nəhəngi “Mançester Yunayted”in baş məşqçisi vəzifəsinə təyin edilib.
Arena.az bu barədə “Mançester Yunayted”in rəsmi saytına istinadən məlumat verir:
“Ruben Amorim Avropa futbolunun ən maraqlı və yüksək qiymətləndirilən gənc çalışdırıcılarından biridir”, – “qırımızı şeytanlar”ın mətbuat xidməti portuqal mütəxəssisin təyinatı ilə bağlı bəyanatında bildirib.
39 yaşlı portuqal mütəxəssisin “qırmızı şeytanlar”la müqaviləsinin müddəti 2027-ci ilin iyun ayına qədər nəzərdə tutulub. Həmçinin tərəflərin razılaşmasında müqavilə müddətinin daha bir mövsüm uzadılması ilə bağlı müvafiq maddə əksini tapıb.
Amorim “qırmızı şeytanlar”ın sükanı arxasında işinə noyabr ayının 11-də başlayacaq. Buna qədər isə komandanı baş məşqçi səlahiyyətlərinin müvəqqəti icraçısı, niderlandlı mütəxəssis Rud van Nistelroy çalışdıracaq.
Xatırladaq ki, daha əvvəl mətbuatda, “Mançester Yunayted”in, Ruben Amorimin “Sportinq”lə müqaviləsinə vaxtından əvvəl xitam verdiyi üçün, Lissabon klubuna 15 milyon avro məbləğində təzminat haqqı ödəyəcəyi ilə bağlı məlumat yayılıb.
Vurğulayaq ki, Amorim Avropanın ən perspektivli çalışdırıcılarından biri hesab edilir. “Sportinq”də Amorim Portuqaliya nəhəngləri “Benfika” və “Portu”ya divan tutan rəqabətəqadir kollektiv təsis edə bilib. Məhz bu amil “Mançester Yunayted”in Ruben Amorimi “qırmızı şeytanlar”a yeni baş məşqçi seçməsində əsas olub.
Ruben Amorim məşqçiliyə 2018/2019-cu illər mövsümündə “Kaza Piya” klubunda başlayıb. Bundan sonra gənc portuqal mütəxəssis “Braqa”nın “B” komandasını, ardınca isə əsas komandasını çalışdırıb. 2020-ci ilin mart ayında isə Amorim “Sportinq”in sükanı arxasına keçib. Portuqal mütəxəssisin Lissabon klubu ilə müqaviləsi 2026-cı ilin iyun ayının sonuna qədər qüvvə idi.
Amorim rəhbərliyi müddətində “şirlər”ə 2 dəfə Portuqaliya Premyer Liqasını (2020/2021, 2023/2024), 2 dəfə Portuqlaiya Liqa Kuboku (2020/2021, 2021/2022) və Portuqaliya Super Kubokunu (2021/2022) qazandırıb. Həmçinin Amorim “Braqa” ilə Portuqaliya Liqa Kubokunun (2019/2020) qalibi olub.
