Polşanın ölkənin şərqində yerləşən Lyublin şəhərində partlamamış hava bombası aşkar edilib.
Qaziler.az bildirir ki, bu barədə “Polsat” məlumat yayıb. Nəşr qeyd edib ki, ərazidəki əhali təxliyə edilib və 3 minə yaxın insan müvəqqəti olaraq evlərini tərk etməli olub. Mütəxəssislər mərminin İkinci Dünya Müharibəsindən qaldığını irəli sürüblər.
“Lyublin şəhərində tikinti podratçısı İkinci Dünya Müharibəsindən qalma partlamamış bomba ilə qarşılaşıb”, - nəşr yazıb.
Məlumata görə, partlamamış mərmi noyabrın 14-ü axşam saatlarında tapılıb. Vətəndaşlar fövqəladə xidmətə müraciət edib, bundan sonra istehkamçılar hadisə yerinə gəliblər.
Mütəxəssislər əvvəlcə sursatın ətrafını mühasirəyə alıb, sonra isə yaxınlıqdakı 6 küçənin sakinlərini təxliyə etmək qərarına gəliblər. Bu yerdən 200 metr aralıda potensial təhlükəli zona da müəyyən edilib.
Bomba mütəxəssisləri bir gün ərzində bombanı zərərsizləşdirə biləcəklərinə söz veriblər. Materialda mərmi, o cümlədən onun növü haqqında heç bir təfərrüat göstərilməyib.
QAZİLER.AZ
