Rusiyanın Əməkdar artisti Vladimir Şklyarov faciəvi şəkildə dünyasını dəyişib.
Axşam.az rus mediasına istinadən xəbər verir ki, 39 yaşlı balet artistinin ölümünə 5-ci mərtəbədən yıxılması səbəb olub. Bildirilib ki, eyvanda siqaret çəkməyə çıxan sənətçi müvazinətini itirib və yıxılıb. O, hadisə yerində dünyasını dəyişib.
Hazırda polis məsələ ilə bağlı araşdırma aparır.
Rus mediasında yer alan bir digər məlumata görə, Şklyarov son vaxtlar narkotik asılığından əziyyət çəkib və son 1 aydan çoxdur içkiyə qurşanıb. Belə ki, Şklyarov bir müddət əvvəl keçmiş həyat yoldaşı balerina Mariya Şirinkinaya narkotik aludəçisi olduğunu etiraf edib və ondan onu "qapalı saxlamasını" istəyib. Lakin bir müddət sonra o, mənzili tərk etmək qərarına gəlib və qonşunun eyvanına çıxıb. Sənətçi öz eyvanına qayıtmaq istəyərkən yıxılıb.
Lakin Şklyarovun qohumları onun narkotikdən istifadə etdiyini inkar edirlər. Onların sözlərinə görə, Şklyarov bel ağrılarına görə əməliyyata hazırlaşırdı, bu səbəbdən ağrıkəsicilər qəbul edirdi və o, hava almaq üçün balkona çıxıb.
