Rusiya Ukraynaya qarşı hücumlarda ilk dəfə qitələrarası ballistik raketlərdən istifadə edib. Bu barədə Ukrayna Hərbi Hava Qüvvələri bəyanat yayıb. Rusiya Müdafiə Nazirliyi isə hələlik bu iddialarla bağlı heç bir açıqlama verməyib.
Bu arada, Rusiya Xarici İşlər Nazirliyinin sözçüsü Mariya Zaxarovaya gündəlik mətbuat konfransı zamanı gələn telefon zəngi "Telegram" kanallarında geniş əks-səda doğurub. Danışıqlardan belə aydın olur ki, Zaxarovaya Ukraynaya qitələrarası ballistik raket hücumları ilə bağlı heç bir açıqlama verməməsi tapşırılır.
Videoda Zaxarovanın telefonuna zəng gəlir və o telefonu açaraq bir müddət qulaq asır, sonra isə söhbətini davam etdirdiyi görünür. Telefon xəttində “Maşa” deyə müraciət edən şəxs, “Biz ballistik raket hücumlarına münasibət bildirmirik” deyir. Zaxarova isə telefondakı şəxsə təşəkkür etdikdən sonra mətbuat konfransını davam etdirir.
Baş verənləri TASS xəbər agentliyinə şərh edən mətbuat katibi deyib ki, brifinqdən əvvəl internetdə yayılan ziddiyyətli məlumatlara görə bəzi suallar yaranıb: "Mən ekspertlərdən məsələnin Xarici İşlər Nazirliyi tərəfindən şərh olunub-olunmamasını soruşdum. Brifinq zamanı "Biz şərh vermirik" cavabı gəldi".
TAHİR
