“Bayer”in baş məşqçisi Xabi Alonso UEFA Çempionlar Liqasının Liqa mərhələsinin 6-cı turunda “İnter”ə qarşı keçirdikləri oyunu şərh edib.
Arena.az xəbər verir ki, Almaniya çempionu doğma meydanda qarşılaşdığı İtaliyanın ən güclüsü ilə oyundan 1:0 hesablı qələbə ilə ayrılıb.
İspan mütəxəssis matçdan sonra baş tutan mətbuat konfransında bunları söyləyib:
“Belə güclü, həqiqətən də yüksək səviyyəli komanda ilə oyunda nəticə əldə etmək çox xoşdur. Biz israrlı idik – məqamımızı gözlədik və bundan yararlandıq. Mukiele getdikcə komandaya uyğunlaşır. O, gələcəkdə bizə daha çox şey verəcək”, deyə Xabi Alonso vurğulayıb.
Xatırladaq ki, “əczaçılar”ın yeganə qolunu Leverkuzen klubunun PSJ-dən icarəyə götürdüyü fransalı sağ cinah müdafiəçisi Nordi Mukiele 90-cı dəqiqədə vurub.
6 oyundan 13 xalla “Bayer” UEFA Çempionlar Liqasının Liqa mərhələsinin yarış cədvəlində 2-ci pillədə qərarlaşıb. “İnter” isə 13 xalla 4-cü pillədədir.
