Bakı, TurkicWorld
Aylardır Beynəlxalq Kosmik Stansiyada (BKS) qapalı qalan iki ABŞ astronavtının Yerə dönüşünün ən tez 2025-ci ilin martına kimi təxirə salınıb.
TurkicWorld xəbər verir ki, bu barədə NASA -dan açıqlama verilib.
İyun ayında Boeing-in Starliner kosmik gəmisi ilə BKS-ə çatan təcrübəli astronavtlar Butch Wilmore və Suni Williams stansiyada cəmi səkkiz gün qalmağı planlaşdırırdılar. Lakin Starliner-in hərəkət sistemindəki problemlər səbəbindən NASA geri dönüş planlarını dəyişdirmək məcburiyyətində qalıb.
Uğursuz sınaqların ardından NASA, Starliner-i ekipajsız şəkildə Yerə qaytarmağa qərar verib. Wilmore və Williamsın Yerə dönüşü isə SpaceX-in Crew-9 missiyası çərçivəsində həyata keçirilməlsi nəzərdə tutulmuşdu.
Crew-9 komandası sentyabr ayında Dragon kosmik gəmisi ilə BKS-ə gəlib və Wilmore ilə Williams üçün iki boş yer təmin edib. Əvvəlki plana əsasən, dörd astronavt 2025-ci ilin fevralında Yerə qayıtmalı idi.
Lakin NASA Crew-10 missiyasının başlanmasını ən tez 2025-ci ilin martına təxirə saldığını açıqlayıb. Bu dəyişiklik, Wilmore və Williamsın Crew-9 komandası ilə birlikdə “təslim prosesi” üçün BKS-də daha uzun müddət qalacağı anlamına gəlir.
Nəticədə, Wilmore və Williams üçün əvvəlcə planlaşdırılmış səkkiz günlük missiya, doqquz aydan çox uzanmış olacaq.
Qeyd edək ki, SpaceX, Elon Musk-ın rəhbərliyi altında, BKS komandalarının müntəzəm dəyişdirilməsi üçün hər altı aydan bir uçuşlar həyata keçirir.
