BMT Baş Assambleyası Rusiyanın təşəbbüsü ilə “Nasizmin, neonasizmin və irqçiliyin, irqi ayrı-seçkiliyin, ksenofobiyanın və bununla bağlı dözümsüzlüyün müasir formalarının alovlanmasına kömək edən digər təcrübələrin təriflənməsi ilə mübarizə” başlıqlı qətnamənin qəbul edilməsinə səs verib.
Sfera.az xəbər verir ki, bu barədə “TASS” məlumat yayıb.
Məlumata görə, sənədi 119 ölkə dəstəkləyib, 53 ölkə əleyhinə, 10 ölkə bitərəf qalıb. Bunun əleyhinə səs verənlər arasında Almaniya, İtaliya, Kanada, ABŞ, Ukrayna və Yaponiya da var. Onu dəstəkləyən ölkələr arasında Azərbaycan, Əlcəzair, Ermənistan, Belarus, Boliviya, Braziliya, Çin, Kuba və Serbiya var.
Rusiyanın BMT-dəki daimi nümayəndəsinin müavini Mariya Zabolotskaya bildirib ki, bu qətnamə nasizm, irqçilik və ksenofobiya ilə mübarizədə beynəlxalq əməkdaşlığı genişləndirmək məqsədi daşıyır.
“Səsvermənin nəticələri beynəlxalq ictimaiyyətin yuxarıda qeyd olunan təcrübələrin aradan qaldırılmasına davamlı dəstəyini və sadiqliyini açıq şəkildə nümayiş etdirdi”, - rusiyalı diplomat bildirib.
Qeyd edək ki, Rusiya və onun dünyanın müxtəlif yerlərindən olan həmmüəllifləri 20 ilə yaxındır ki, 2005-ci ildən bəri hər il bu qətnaməni təqdim edir və o, həmişə beynəlxalq ictimaiyyətdən geniş dəstək alır. Sənədin builki nəşrində 74 müddəa var.
Firuzə Əliyeva
