"Intel" səhmdarları keçmiş baş direktor Pat Gelsinger, müvəqqəti icraçı direktor və maliyyə direktoru David Zinsner və idarə heyətinin üzvlərinə qarşı iddia qaldırıblar.
Redaktor.az-ın məlumatına görə, iddia edilir ki, rəhbərlik fidusiar öhdəliklərini pozub və şirkətin aktivləri üçün əsassız xərclər edib.
Bunun əsas səbəbi uğursuz "Intel Foundry Services" (IFS) strategiyası olub. Bölmə 2023-cü ildə 7 milyard dollar, 2024-cü ilin ikinci rübündə isə 2,83 milyard dollar əməliyyat zərəri qeydə alıb.
Maliyyə problemləri dividendlərin kəsilməsinə və işçilərin ixtisarına səbəb olub. Gelsinger dekabr ayında baş direktor vəzifəsini tərk edib.
Səhmdarlar həmçinin korporativ hesabatların IFS-in real risk və itkilərini açıqlamadığını söyləyərək rəhbərliyi şəffaflığın olmamasında ittiham edirlər. Şirkət öz biznes perspektivləri ilə bağlı investorları çaşdırmaqda ittiham olunur.
"Intel" iddia ilə bağlı şərh verməkdən imtina edib.
Sevinc İBRAHİMZADƏ
