Fransada prezident Emmanuel Makron tərəfindən 13 dekabrda baş nazir təyin edilən Fransua Bayru yeni hökuməti qurub.
Elise Sarayının baş katibi Aleksis Kohler mərkəz sağçı Demokrat Hərəkat (MoDem) partiyasından baş nazir təyin edilən və 10 gündür siyasi partiyalarla müzakirələr aparan Bayrunun yeni hökuməti qurduğunu elan edib.
Onun yeni kabinetində Müdafiə naziri Sebastyan Lekornu, Xarici işlər naziri Jan-Noel Barro, Daxili işlər naziri Bruno Retalyu və Mədəniyyət naziri Rəşida Dati vəzifələrini qoruyub saxlayıb. Lakin digər bütün nazirlər dəyişdirilib.
Ölkədə iyun ayında keçirilən növbədənkənar ümumi seçkilərdə heç bir partiya və ya ittifaq təkbaşına hökumət qurmaq üçün lazım olan çoxluğu əldə edə bilməmiş və ölkə tarixinin ən parçalanmış parlament mənzərəsi yaranmışdı. Makron 5 sentyabrda seçkilərin qalibi olan solçu Yeni Xalq Cəbhəsi (NFP) ittifaqı yerinə parlamentin ən kiçik partiyası olan Respublikaçılardan (LR) mərkəz sağçı Mişel Barniyeri baş nazir təyin etmiş və seçkilərdən təxminən 3 ay sonra hökumət qurulmuşdu.
2025-ci il büdcə layihəsi ilə bağlı razılığa gələ bilməyən müxalifətdəki solçular və ifrat sağçılar artıq zəif olan Barniyer hökumətinə qarşı 4 dekabrda etimadsızlıq təklifi irəli sürmüşdü. Təklif 331 millət vəkilinin dəstəyini alaraq hökuməti devirmək üçün lazım olan 288 səsi keçmişdi.
Qeyd edək ki, ölkədə 62 ildən sonra ilk dəfə bir hökumət müxalifətin etimadsızlıq təklifi ilə devrilmişdi.
