“Xarıbülbül” Azərbaycan Vizyon Teatr Birliyi və “Tək hədəfim” Təhsil Birliyinin əməkdaşlığı ilə həyata keçirilən “Biz birlikdə güclüyük” layihəsi çərçivəsində İstanbulda “Zəngəzur sənətkarlığı” sərgisi keçirilib.
Azərbaycanın İstanbuldakı Baş Konsulluğu və Türkiyədəki Səfirliyimizin nəzdindəki Azərbaycan Mədəniyyət Mərkəzinin dəstəyi ilə təşkil olunan sərgidə yerli azərbaycanlılar, elm, mədəniyyət nümayəndələri, bələdiyyə rəhbərləri, jurnalistlər iştirak ediblər.
İstanbuldakı “Xarı Bülbül” Azərbaycan Vizyon Teatr Birliyinin rəhbəri Kəmalə Cabbarova layihə haqqında danışaraq, Qərbi Azərbaycanda, Zəngəzurda xalqımızın yaratdığı böyük tarixi mirasa dair fikirlərini bölüşüb. Azərbaycanın İstanbuldakı konsulu Zaur Allahverdizadə, Mərmərə vəqfının rəhbəri Akkan Suver itirilmiş dəyərlərimiz, Zəngəzurun tarixi və Qərbi Azərbaycan reallıqları haqqında fikirlərini söyləyərək, ulu yurdlarımıza qayıdış zərurətindan danışıblar.
Azərbaycanın Türkiyədəki səfirliyinin nəzdindəki Mədəniyyət Mərkəzinin direktoru Samir Abbasov xalqımızın əzəli torpaqları olan Qərbi Azərbaycanda min illər boyu yaratdığı böyük mədəniyyət və sənət irsi haqqında danışaraq, tarixin müxtəlif dövrlərində yurd yerlərimizə ermənilərin köçürüldüyünü, azərbaycanlıların isə öz ata-baba yerlərindən deportasiya olunduğunu qeyd edib. O, nə illah eləsələr də, qədim torpaqlarımızdan Azərbaycan ruhunu və irsini silə bilmədiklərini vurğulayıb.
Sonra “Zəngəzur sənətkarlığı” layihəsi haqqında danışılıb, məşhur Sərdarlılar ailəsinin ərsəyə gətirdiyi dekorativ incilər – Qərbi Azərbaycana dair mədəni irs nümunələri haqqında məlumat verilib, gələcəkdə də bu cür layihələrə dəstək göstəriləcəyi qeyd edilib.
Daha sonra Bakıdan Zəngəzur sənətkarlığı (əl sənəti) sərgisini gətirən Azərbaycan Rəssamlar İttifaqının üzvləri İsgəndər, Lalə və Toğrul Sərdarlılar çıxış edərək layihənin özəllikləri haqqında məlumat veriblər.
Proqramın bədii hissəsi Üsküdarda hərəkətdə olan “Validə Sultan” gəmisinin 2-ci qatında davam edib. Tədbir böyük maraqla qarşılanıb, 2 saatlıq dəniz gəzintisi ilə başa çatıb.
Qafar ÇAXMAQLI,
“XQ”-nin xüsusi müxbiri
İstanbul
