2024-cü ildə Rusiyada ən çox oğurlanan avtomobil markaları açıqlanıb.
Hafta.az-ın Autonews.ru-ya istinadən yazdığına görə, sığorta şirkətləri tərəfindən hazırlanan siyahının başında Kia, Lada, Volkswagen və Hyundai markalı avtomobillər qərarlaşıb. Portal qeyd edir ki, siyahıya yalnız sığortası olan avtomobillər daxildir.
2024-cü ildə ən çox oğurlanan avtomobillər arasında Kia K5, Kia Sportage, Lada Vesta və Hyundai Tucson seçilir. “Reso-Garantiya” sığorta şirkətinin məlumatına görə, bu markalar oğrular arasında ən populyardır. Bundan əlavə, Hyundai Solaris, Volkswagen Polo və Lada Granta kimi daha sərfəli modellər tez-tez oğurlanan avtomobillər sırasındadır.
Rusiya Daxili İşlər Nazirliyi 2024-cü ilin ilk beş ayında avtomobil oğurluğu və oğurlanmış nəqliyyat vasitələrinin işlərinin azaldığını bildirib. Nazirliyin məlumatına görə, yanvar-may aylarında avtomobil oğurluğu 28,6 faiz, oğurluq hadisəsi isə 11,6 faiz azalıb. “Soglasie” sığorta şirkəti də bu azalmanı təsdiqləyir və 2024-cü ildə oğurlanmış avtomobillərin sayının ötən illə müqayisədə iki dəfə azalacağını bildirir.
Amma bəzi sığorta şirkətləri müəyyən avtomobil markalarının hələ də oğruların diqqətini cəlb etdiyini bildirir. Məsələn, “Absolute Insurance” şirkəti ən çox oğurlanan avtomobillərin Mercedes-Benz və Toyota olduğunu açıqlayıb. Hyundai və Kia brendləri də oğrular arasında populyar olaraq qalır.
Çin avtomobillərinin populyarlığının artmasına baxmayaraq, “Absolute Insurance” şirkətinin nümayəndəsi qeyd edib ki, Çindən gətirilən avtomobillərin oğurlanması halları hələ də aşağı səviyyədədir. Bununla belə, şirkət Haval Jolion və Chery Tiggo 7 kimi məşhur modellərin oğurlanmasının tezliklə arta biləcəyini proqnozlaşdırır.
