Qətər ABŞ-ı əmin edib ki, Fələstinin HƏMAS hərəkatının nümayəndələri avqustun 15-də Dohada keçiriləcək Qəzza zolağında atəşkəs razılaşması üzrə danışıqlarda iştirak edəcəklər.
Bunu jurnalistlər üçün keçirdiyi növbəti brifinqdə ABŞ Dövlət Departamenti mətbuat xidmətinin rəis müavini Vedant Patel deyib.
“Qətərli tərəfdaşlarımız bizi əmin etdilər ki, HƏMAS nümayəndələri iştirak edəcək və mən, əlbəttə ki, onların bu barədə özlərinin danışmasını istəyərəm.
Bundan başqa, mən təfərrüata varmaq fikrində deyiləm”, - deyə o bildirib. Patel əlavə edib ki, Vaşinqton danışıqların davam edəcəyini gözləyir.
Dövlət Departamentinin nümayəndəsi qeyd edib ki, İsrail hazırkı saziş layihəsini tamamlamağa hazırdır.
“ABŞ və Misir prezidentləri, həmçinin Qətər əmiri keçən həftə bəyanatlar verəndə İsrail sabah başlayacaq atəşkəs danışıqlarında iştirak edəcəyini təsdiqlədi. İndi masada olan sövdələşməni başa çatdırmağa hazırdılar”, - deyə o vurğulayıb.
Musavat.com xatırladır ki, Qəzzada atəşkəsə dair danışıqların yeni mərhələsinin cümə axşamı Dohada baş tutacağı gözlənilir. İsrail hökuməti artıq Mossad-ın direktoru David Barneanın başçılıq edəcəyi nümayəndə heyətinin oraya göndərilməsinə razılıq verib. Fələstinin HƏMAS hərəkatı məsləhətləşmələrdə iştirakdan rəsmən imtina etməyib. Avqustun 11-də vasitəçiləri Qəzza zolağında atəşkəs sazişinin həyata keçirilməsi üçün konkret plan təqdim etməyə və İsraili onu yerinə yetirməyə məcbur etməyə çağırıb.
