Litva təhlükəsizlik tədbirlərini artıraraq Rusiya ilə sərhədində müdafiə xətlərini gücləndirmək üçün addımlar atır.
Hafta.az-ın yazdığına görə, Kalininqrad vilayətindəki Sovetski bölgəsi ilə birləşən strateji Luiza körpüsünə hərbi texnikanın irəliləməsini ləngitmək məqsədilə “əjdaha dişləri” kimi tanınan minalar, kirpilər və tank əleyhinə maneələr yerləşdirilib. Bu piramida formalı beton istehkamlar hərbi müdafiə xətlərinin mühüm hissəsi olaraq xidmət edir.
“X” sosial media platformasında yaydığı açıqlamada Litva Müdafiə Nazirliyi bu tədbirlərin ölkənin təhlükəsizliyini təmin etmək məqsədi daşıyan “ehtiyat tədbiri” olduğunu bildirib.
Körpü Rusiyaya məxsus olduğu üçün Litva yalnız öz sərhədləri daxilində belə istehkamlar tikə bilər. “Əjdaha dişləri” də Neman çayının sahilində qoyulub.
Litva hökuməti ilin sonuna qədər Rusiya və Belarusla sərhədlərində tank əleyhinə maneələrin quraşdırılması üçün 4 milyon avrodan çox büdcə ayırmağı planlaşdırır.
Respublikanın milli müdafiə naziri Laurinas Kasciunas bildirib ki, bu tədbirlər NATO-nun şərq sərhədinin mühafizəsi strategiyası çərçivəsində Latviya və Estoniya ilə birlikdə hazırlanmış əks-mobilizasiya planlarının bir hissəsidir. Nazir Kasciunas vurğulayıb ki, bu maneələr “düşmənin sərhəddə mümkün irəliləyişini effektiv şəkildə əngəlləyəcək”.
Litvanın müdafiə büdcəsi qarşıdakı 10 il ərzində hərbi əks-hərəkətlilik tədbirlərinə ümumilikdə 600 milyon avro investisiya qoyulmasını nəzərdə tutur. Bu investisiyalar regional təhlükəsizliyin təmin edilməsində və NATO-nun şərq cinahında çəkindirmənin artırılmasında böyük əhəmiyyət daşıyır.
