Dünən Naxçıvan Muxtar Respublikası Ali Məclisinə 1 sentyabr 2024-cü il tarixdə keçirilmiş seçkilərə dair Naxçıvan Muxtar Respublikası Ali Məhkəməsinin konstitusiya icraatı qaydasında iclası keçirilib.
Naxçıvan Muxtar Respublikası Ali Məhkəməsindən redaksiyamıza verilmiş məlumatda bildirilir ki, iclası Naxçıvan Muxtar Respublikası Ali Məhkəmənin sədri Səadət Bəktaşi açıb. O, Naxçıvan Muxtar Respublikası Konstitusiyasının 16-cı maddəsinə uyğun olaraq Muxtar Respublika Mərkəzi Seçki Komissiyasından daxil olmuş materiallar üzrə Ali Məclisə keçirilmiş seçkilərin nəticələrinin yoxlanılmasınа dair işə konstitusiya icraatı qaydasında baxıldığını bildirib, məhkəmə tərkibini elan edib.
Sonra Ali Məhkəmənin hakimi Əli Allahverdiyev seçkilərin nəticələrinin yoxlanılması və təsdiq edilməsinə dair məruzə ilə çıxış edib. Muxtar Respublika Mərkəzi Seçki Komissiyasının sədri Əkrəm Hüseyn-zadə isə seçkilərə hazırlıq prosesindən başlayaraq, son nəticələrə qədər həyata keçirilmiş işlər barədə geniş məlumat verib.
Naxçıvan Dövlət Statistika Komitəsinin aparat rəhbəri Həbib Rzayev qurumun mütəxəssislərinin yoxlama prosesində yaxından iştirak etdiyini bildirərək yoxlamanın yekununa dair rəyi elan edib. Çıxışlardan sonra məhkəmə tərkibi müvafiq qərar qəbul etmək üçün müşavirə otağına gedib.
İclasın sonunda Səadət Bəktaşi Muxtar Respublika Ali Məclisinə növbədənkənar seçkilərin nəticələrinə dair yekun qərarı elan edib. Qərara əsasən, seçki dairələri üzrə seçkilərin nəticələri, bütövlükdə, təsdiq olunub.
XQ
