Bu il aprelin 5-də Brüsseldə Ermənistanın baş naziri, ABŞ Dövlət katibi və Avropa Komissiyasının rəhbəri arasında keçirilmiş görüşdən sonra guya Ermənistanda sosial-iqtisadi inkişafa dəstək bəhanəsi ilə başlanan təxribatların coğrafiyası getdikcə genişlənir. Ermənistanın ərazisində guya təhlükəsizliyin təminatı bəhanəsi ilə Avropa İttifaqının mülki missiyasının yerləşdirilməsi, sayının artırılması vəziyyəti daha da mürəkkəbləşdiri. Xatırladaq ki, missiya iştirakçılarının Azərbaycanın Ermənistanla şərti sərhəddində «binokl diplomatiyası»ndan istifadəsi Brüsseldə ölkəmizə qarşı planlaşdırılan gizli sövdələşmələrin ”tərkib hissəsi olmaqla sonrakı təxribatların ilk mərhələsi idi. Bəllidir ki, Almaniyanın və Fransanın güc strukturlarının təmsilçilərindən formalaşdırılan missiya Azərbaycan başda olmaqla Cənubi Qafqaz respublikalarında kəşfiyyatla məşğul olur. Avropa müşahidəçilər missiyasının” müddətinin Azərbaycanın razılığı olmadan, məsləhətləşmədən uzadılması qəbuledilməz olduğu kimi, beynəlxalq hüquqa və siyasi mədəniyyət standartlarına hörmətsizlik idi.
Hazırda Cənubi Qafqazda siyasi sabitliyin pozulmasında, təhlükəli proseslərin daha da gərginləşməsində dirijor rolunda çıxış edən ABŞ-ın Ermənistanda hərbi təlimlər keçirməsi NATO-nun Cənubi Qafqaza təsirini artırmaq naminə atılan ilk və təhlükəli addımdır. ABŞ-ın , Qərbin beynəlxalq mexanizm hesab etdiyi formatlar çərçivəsində Cənubi Qafqaza müdaxilələri, Ermənistanın silahlandırma siyasətinin davam etdirilməsi Azərbaycana, eyni zamanda, Gürcüstana qarşı təxribatlardır. Ermənistanın revanşist dairələrini Azərbaycana qarşı yenidən ərazi iddiaları çağırışı ilə qızışdıran ABŞ-ın və Qərbin dəstəyi ilə Azərbaycan mövqelərinin davamlı atəşə tutulmasının əsas məqsədi artıq tarixin arxivinə atılmış «Dağlıq Qarabağ münaqişəsi»nin hələ də davam etdiyi təəssüratını yaratmaq, təqaüdə göndərilmiş Minsk qrupunun «aktuallığını» gündəmdə saxlamaqdır.
30 ilə yaxın Ermənistanın işğalı altında qalan torpaqlarını 44 gün davam edən İkinci Qarabağ müharibəsində işğalçılardan azad edən Azərbaycan tərəfi isə bildirir ki, münaqişə başa çatıb və biz torpaqlarımızı azad etmişik. Prezident İlham Əliyevin dəfələrlə vurğuladığı kimi, heç vaxt münaqişənin tənzimlənməsi ilə məşğul olmayan, yalnız Ermənistanın təcavüzkar siyasətini dəstəkləyən ATƏT-in Minsk qrupuna ehtiyac yoxdur. Region üçün həm unikal təhlükəsizlik mühiti yaradan, dünyada və bölgədə səmərəli əməkdaşlıq imkanları formalaşdıran, Vətən müharibəsindən sonra siyasi- iqtisadi imkanları, hərbi qüdrəti daha da güclənən Azərbaycan ölkəmizə qarşı təhdid və təxribatlara qarşı mübarizəyə hər an hazırdır.
Çox təəssüf ki, sözdə özünü demokratiya tərəfdarı adlandıran, əslində isə dünyanın bir neçə bölgəsində milli münaqişələrə rəvac verən ABŞ Azərbaycanın Cənubi Qafqazda yaratdığı yeni reallıqları, beynəlxalq enerji və nəqliyyat layihələrinə artan marağı həzm edə bilmir. İllərdən bəri təsdiqlənmiş siyasətinə, bölgələrə müdaxilə üçün regional sabitliyə təhlükə yaradan katalizator rolunu davam etdirən ABŞ dünyada mövqeləri möhkəmlənən Azərbaycanın geniş əməkdaşlıq platformasına çevrilməsini istəmir.
«Mən bu gün bu haqda çox danışmaq istəmirəm, amma bilirəm nə baş verir, hansı hadisələr baş verir. Ona görə biz beynəlxalq fəaliyyətimizin səmərəliliyini artırmalıyıq. O təşkilatlarda ki, bizə qarşı əsassız yanaşma var, bizə qarşı ittihamlar irəli sürülür, biz orada mübariz olmalıyıq. Yəni, onların qarşısında yaxşı olmaq yox, dövlət, xalq qarşısında yaxşı olmaq lazımdır. Hansısa məsələni kəskinləşdirmək istəmirəm bəhanəsi ilə kənara çəkilmək yox, əksinə, öz sözünü demək lazımdır. Qərəzli yanaşmanı ifşa etmək lazımdır. Necə ki, mən daim bunu edirəm və kifayət qədər faktlar var. Bunu demək üçün siyasətçi olmaq lazım deyil» söyləyən Prezident İlham Əliyev adi insan hüquqları qorunmayan, terrora dəstək göstərən ölkə təmsilçilərinin Azərbaycana «dərs vermək» cəhdlərini qəbuledilməz adlandırır. Avropanın dırnaqarası demokratik ölkələrində, daha çox Fransada dinc nümayişçilərə qarşı törədilən vəhşiliklər, ksenofobiyalar, dini, irqi ayrı-seçkiliklər beynəlxalq ictimaiyyətin gözləri qarşısında baş verir.
Halbuki ABŞ-ın, Qərbin heyvanlarla eyni qəfəsdə saxladıqları miqrantlar ordusunun yaranmasının səbəbkarları, müəllifləri elə rəsmi Vaşinqton, Avropa İttifaqına üzv Fransa və Almaniya kimi ölkələrdir. Amma dünyada multikultural dəyərləri dəstəklənən, tolerant ölkə kimi nümunə göstərilən Azərbaycanı « insan hüquqları pozulan ölkə» adlandırmaları, Qarabağı könüllü tərk edən ermənilərin guya «doğma torpaqları «artsaxa» qayıtmaları kimi əsassız iddialar səsləndirmələri siyasi naşılıqdır. Bu kimi halların qarşısını qətiyyəti, həqiqəti əks etdirən «Bütün bunları demək lazımdır. Mən bu gün bu kürsüdən bunu deyirəm, açıq, heç kimdən çəkinmədən. Çünki mən haqlıyam və həqiqətə qarşı heç kim heç nə deyə bilməz. Əlbəttə, bax, görərsiniz, bu sözlərdən bir neçə gündən sonra yenə çirkin məqalələr çıxacaq, yenə hansısa bir qondarma təşkilat nəsə bəyanat verəcək ki, Azərbaycanda o, pisdir, bu, pisdir. Eybi yoxdur, qoy desinlər» sözləri ilə alan Prezident İlham Əliyev siyasi sövdələşmələrin regional təhlükəsizliyə vurduğu zərəri qeyd etməklə beynəlxalq təşkilatlarla qanunlar çərçivəsində əməkdaşlığa da xüsusi diqqətlə yanaşır.
Hazırda Ermənistandan istifadə edərək regionda yenidən ciddi gərginlik yaradılması üçün illərdən bəri sınaqdan çıxardıqları münaqişə elementlərini, mexanizmlərini işə salan, Cənubi Qafqazda hərbi və siyasi mövcudluğunu gücləndirməyə çalışan ABŞ və Qərb əsasən Zəngəzur dəhlizi ilə bağlı siyasi gedişlərini aktivləşdirir.
Bəllidir ki, Cənubi Qafqaz regionda gərginliyin artması, həmçinin Rusiyaya qarşı ikinci cəbhə kimi də nəzərdə tutulur.
Ermənistana hərbi dəstəyini artıran rəsmi Vaşinqtonun , Yelisey Sarayının, təxribat xarakterli bəyanatları ilə diqqəti çəkən Niderlandın. Ermənistana dəstəyinin əsas məqsədi Azərbaycana qarşı müharibəyə hazırlıqdır. Bəzi məqamlarda deklorativ şəkildə də olsa sülh istəklərini sərgiləsə də, ancaq ölkə konstitusiyasında dəyişiklik tələbinin ortaya atıldığı məqamda ağalarının diktəsi ilə hərəkət edən Ermənistanın baş naşiri Nikol Paşinyan sərsəmləmələri ilə ərazi iddialarından geri çəkilmədiyini, təxribatçı cəhdlərini davam etdirmək niyyətində olduğunu bildirir.
Son dövrlərdə Azərbaycanın hərbi mövqelərinin atəşə tutulmasının əsas məqsədi də münaqişənin bitmədiyi, davam etdiyi təəssüratını yaratmaqdır, Başqa sözlə deyilsə, Minsk qrupuna nəfəs vermək, gündəmdə saxlamaqdır. Azərbaycan tərəfi isə bildirir ki, münaqişə başa çatıb və biz torpaqlarımızı işğaldan azad etmişik. Odur ki, ATƏT-in Minsk qrupuna ehtiyac yoxdur. Bu qurum heç vaxt münaqişənin tənzimlənməsi ilə məşğul olmayıb, sadəcə, Ermənistanın xeyrinə bölgəyə səyahət edib, saxta tezislər , bəyanatlar hazırlayıb. Bəllidir ki, konstruktiv dialoq üçün Azərbaycan regionda maraqları olan bütün subyektləri uzlaşdırmağa hazır suveren dövlətdir. Azərbaycanın istəyi odur ki, Cənubi Qafqaz regionu təhlükəsizlik coğrafiyasına çevrilsin və geniş əməkdaşlıq platforması yaransın. Prezident İlham Əliyev bu istiqamətdə strateji baxışlara sahibdir və buna uyğun da təsirli addımlar atır. Bu addımların qarşısını alacaq güc yoxdur.
Son vaxtlarda Ermənistana silah-sursat daşıyan təyyarələrin sayının artması, ABŞ hərbçilərinin erməni əsilli əsgərlərlə birgə təlimlərdə iştirakı Vaşinqtonun Azərbaycana qarşı təxribatlarının göstəricisidir. Gələn ay Azərbaycanda keçiriləcək COP29 ərəfəsində təhdidlərini artıran, azərbaycanlılara qarşı mülki, hərbi cinayətlərdə iştirak edən terrorçuları, separatçıları dəstəkləyən, onların azadlığa buraxılması ilə bağlı təzyiqləri gücləndirən Qərb dairələri unutmasınlar ki, heç kim süveren Azərbaycanın daxili işlərinə qarışa və müstəqil dövlətimizlə təhdid dili ilə danışa bilməz. Prezident İlham Əliyevin vurğuladığı kimi, nəyi lazım biliriksə, onu da edəcəyik”. Cənubi Qafqazın munaqişələr poliqonuna çevrilməsinə imkan verilməyəcək.
Xuraman İsmayılqızı, «İki sahil»
