“Mançester Siti”nin yarımmüdafiəçisi və İspaniya millisinin futbolçusu Rodri (Rodriqo Hernandes) “France Football” jurnalının versiyasına görə ilin ən yaxşı futbolçusuna verilən “Qızıl top”u alıb.
Rodri 2023/24 mövsümündə klubunun və milli komandasının uğurunda mühüm rol oynayıb. O, xüsusilə "Siti"nin ardıcıl dördüncü dəfə İngiltərə çempionluğunu qazanmasına kömək etdi və daha sonra Almaniyadakı turnirdə İspaniyanın qələbəsində göstərdiyi təsirli performansa görə UEFA AVRO 2024-də İlin Oyunçusu seçildi.
"Mançester Siti"nin oyunçusu ilk dəfə "Qızıl top"u qazandı!
Maraqlıdır ki, son günə kimi yarışın favoriti “Real Madrid”in braziliyalı cinah oyunçusu Vinisius olub. Ancaq sonda ikinci oldu. Braziliyalı mükafatı almamasına qəzəbli reaksiya verib.
“Onlar hazır deyillər. Lazım olsa, bunu 10 dəfə edəcəm. Onlar məni ən yaxşı kimi tanımağa hazır deyillər” – Vinisius "Qızıl top"-un nəticələri haqqında yazıb.
Qadınlar arasında “Qızıl top”un qalibi ardıcıl ikinci dəfə “Barselona”dan ispaniyalı Aitana Bonmati olub. “France Football” jurnalının versiyasına görə 2024-cü ilin ən yaxşı komandası “Real Madrid” olub və ən yaxşı gənc oyunçu mükafatı "Barselona"nın və İspaniya millisinin 17 yaşlı yarımmüdafiəçisi Lamin Yamala verilib.
Almaz Həsənli
