Oktyabrın 26-da keçirilən parlament seçkilərindən sonra Gürcüstanda baş verənlər böyük narahatlıq doğurur. Manset.az Axar.az-a istinadən xəbər verir ki, bu sözlər AB-nin baş diplomatı Jozep Borrellin bəyanatında əksini tapıb. “Beynəlxalq müşahidəçilər həm seçki kampaniyası zamanı, həm də seçki günü qanun pozuntuları qeydə alıblar. Onlar seçkinin azad və ədalətli keçdiyini qəbul etməyiblər. Şəffaf araşdırma aparılmasını xahiş edirəm. Gürcüstan Mərkəzi Seçki Komissiyası və müvafiq orqanlar pozuntuları, təzyiqləri və seçicilərin hədələnməsini araşdırmalıdır. Bu pozuntular operativ, şəffaf və müstəqil şəkildə aradan qaldırılmalıdır. Gürcüstan AB-yə namizəd ölkədir və bu səbəbdən seçki prosesində tam şəffaflıqdan başlayaraq, Avropa dəyərlərinə sadiqliyini nümayiş etdirməlidir. Ədalətli seçki və qanunun aliliyinə hörmət demokratiyanın təməl daşları və AB-yə üzvlük yolunun ayrılmaz hissəsi və əsasıdır. Mən Gürcüstandakı çətin vəziyyəti təcili müzakirə etmək üçün Siyasi və Təhlükəsizlik Komitəsinə bu gün toplaşmağı xahiş etmişəm. Mən bunu Xarici Əlaqələr Şurasının noyabr iclasının gündəliyinə də daxil etmişəm. Gürcüstan xalqı aylardır demokratik dəyərlərə və ölkəsinin AB yolunda irəliləməsinə sadiqliyini nümayiş etdirir. Onlar seçki prosesində aydınlığa layiqdirlər ki, növbəti hökumətin legitimliyinə inamları olsun. Etirazların və hökumətin onlara reaksiyasının dinc şəkildə davam etməsi vacibdir. Ölkədə demokratik geriliyi aradan qaldırmaq, plüralist, demokratik cəmiyyəti təşkil edən media, vətəndaş cəmiyyəti və müxalifət üçün əlverişli mühitin təmin edilməsinə ehtiyac var”, - bəyanatda bildirilib. Qeyd edək ki, 26 oktyabrda Gürcüstanda keçirilən parlament seçkilərində hakim Gürcü Arzusu Partiyası 53,93 faiz səslə qalib gəlib. Parlamentə düşməyi bacaran 4 müxalif koalisiya və Prezident Zurabişvili seçkilərin saxtalaşdırıldığını elan edərək, nəticələri tanımaqdan imtina edib.
