Yunanıstanda İqlim Böhranı Nazirliyinin yaxınlığında mövsümi yanğınsöndürənlərlə polis arasında toqquşma baş verib, iki yanğınsöndürən və 12 polis yaralanıb...
Poliqon xəbər verir ki, bu barədə ERTnews telekanalı məlumat yayıb.
Qeyd edilir ki, Yunanıstan İqlim Böhranı Nazirliyinin yaxınlığında keçirilən etiraz aksiyası zamanı polis yanğınsöndürənlərə qarşı gözyaşardıcı qazdan istifadə edib.
Telekanal vurğulayır ki, iki yanğınsöndürən döyülərək xəsarət alıb və gözyaşardıcı qazdan nəfəs almaqda problemlər yaranıb. Onlar təcili yardım maşınında tibb müəssisəsinə aparılıb. Hadisə yerində daha 8 yanğınsöndürənə ilkin tibbi yardım göstərilib.
Bildirilir ki, etirazlar zamanı azı dörd nəfər həbs edilib.
Qeyd olunur ki, yüzlərlə mövsümi yanğınsöndürən yanğın mövsümü başa çatdıqdan dərhal sonra müqavilələrinə xitam verilməsinə cavab olaraq etiraz aksiyası keçirib. Onlar yanğınsöndürmə idarəsində mövcud olan 4000 vakansiyadan bəzilərini doldurmaq üçün işə götürülməsini xahiş edirlər.
Poliqon.info
