Azərbaycan Respublikası Atçılıq Federasiyasının (ARAF) təşkilatçılığı ilə yorğa atların ölkə çempionatı və cıdır mövsümünün bağlanışı ilə əlaqədar yarışlar başa çatıb.
90deqiqe.Az xəbər verir ki, çempionatda Azərbaycanın müxtəlif regionlarında doğulan yerli yorğa atlar 7 müxtəlif kateqoriyada və məsafədə güclərini yoxlayıblar.
Binə Atçılıq Mərkəzində reallaşan yarışda dördü Qarabağ, Dilbaz və ingilis atlarının qaçışları, səkkizi yorğa atların yarışları olmaqla, ümumilikdə 12 kubok uğrunda mübarizə aparıblar.
Qaçışlar 1 200, 1 400, 1 600, 1 800, 2 000, 2 400 və 3 200 metr məsafələrdə, erkək, dişi və axta atlar arasında, eyni zamanda, atlar və ayrılıqda dayçalar arasında təşkil olunub.
Yorğa qaçışının nəticələrinə əsasən, 3 yaşa qədər atlar arasında 1 200 metr məsafədə “Zülcənah” ləqəbli atla İsfəndiyar İbrahimov, 1 400 metr məsafədə “Qartal” ləqəbli atla Kamran Şərifov çempion olublar. 6 yaş yuxarı atlar arasında 1 600 metr məsafədə “Düldül” ləqəbli atla Mahir Həsənov, 1 800 metr məsafədə “Halko” ləqəbli atla Xəlil Allahverdiyev birinci yeri tutublar. 5 yaş yuxarı atlar arasında 2 000 metr məsafədə “Sultan” ləqəbli atla Əli Məmmədov, 2 400 metr məsafədə isə “Koma” ləqəbli atla Xəlil Allahverdiyev kubokun sahibi olublar. X.Allahverdiyev həmçinin, 4 yaş yuxarı atlar arasında 3 200 və 1 800 metr məsafədə də qələbə qazanıb.
Bu gün yorğa atların çempionatı ilə yanaşı, cıdır mövsümünün bağlanışı ilə əlaqədar yarışlar da keçirilib. Cıdır yarışların nəticələrinə əsasən, 1 600 metr məsafədə, 3 yaş yuxarı Dilbaz atları arasında “Tunarın Kralı” ləqəbli atla Hilal Nəzərov, 1 600 metr məsafədə, 3 yaş yuxarı Qarabağ atları arasında “Kainat” ləqəbli atla Azər Əliyev ölkə çempionu olublar. 1 600 metr məsafədə, 3 yaşında ingilis atları arasında “Might Prince” ləqəbli atla Azər Əliyev, 1 400 metr məsafədə, 4 yaş yuxarı ingilis atları arasında isə “Bahr” ləqəbli atla Hilal Nəzərov bütün rəqiblərini qabaqlayaraq kuboka sahib çıxıblar.
Qarabağ, Dilbaz, ingilis və yorğa atların iştirakı ilə baş tutan yarışların sonunda qaliblərə diplom, kubok və müxtəlif mükafatlar təqdim olunub.
