1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəyli tərəfindən təqdim edilən "İrsimiz" rubrikasının növbəti buraxılışı hazırlanıb.
Oxu.Az xəbər verir ki, "Zəngəzurdakı kilsələrin üzərində türk şəxs adları yazılıb" adlı buraxılışda artefakt araşdırmaçısı Sabit Qurbanov Zəngəzur və Dərələyəz mahalında mövcud olan damğalardan bəhs edir.
Onun sözlərinə görə, türk tayfalarının damğaları bütün Qafqaz boyunca yayılıb. Krımdan Türküstana qədər tapılan damğalar Xəzərlərə məxsusdur. Aşkar edilən damğalar Oğuz boylarının simvollarıdır. Azərbaycan ərazisində damğalar türklərin Xəzər, Qıpçaq və Oğuz qollarına aiddir. Qobustandakı damğaların eynisi Qazaxıstanın Mangistau vilayətində də mövcuddur. Qobustandakı damğalar arasında Noqay işarələri də var.
S. Qurbanov sonda bildirib ki, Dərələyəz mahalında olan Səlim karvansarasının üzərində Salur damğasının yazılmasına, bu ərazidə olan yəhudi məzarlığının Xəzər tayfalarına aid olmasına və Zəngəzur mahalındakı kilsələrin üzərində türk şəxs adlarının yazılmasına aydınlıq gətirir.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Daha ətraflı Baku TV-nin süjetində:
