2024-cü ilin ilk üç rübündə “Maserati” avtomobillərinin satışları 58,3% azalıb.
Valyuta.az xəbər verir ki, bu barədə “Carscoops” portalı məlumat verib.
Portalın məlumatına görə, bu ilin 9 ayı ərzində şirkət 8,6 min avtomobil satmağa nail olub.
2023-cü ildə “Maserati” 20,6 min ədəd avtomobil satıb. Satışların azalması fonunda şirkətin baş direktoru Devid Qrasso istefa verib.
“Stellantis”in baş direktoru Karlos Tavares aşağı satışları “mücərrəd” marketinq strategiyası və dilerlərin avtomobillərə böyük endirimlər tələb etməsi ilə əlaqələndirib.
“Maserati” 2027-ci ilə qədər üç yeni avtomobil modelini buraxacaq. Onların hamısı elektriklə işləyən avtomobillər olacaq.
2025-ci ildə “Maserati” MC20 superkarının elektrik variantını - “Folgore” versiyasını bazara çıxaracaq.
2027-ci ildə şirkət hazırda E-UV BEV şərti adı ilə tanınan flaqman krossoverini buraxacaq. Çox güman ki, model yeni ad alacaq və “Maserati Levante”nin ikinci nəsli olmayacaq.
2028-ci ildə “Maserati” şirkəti “Maserati”nin yeni nəsil flaqman sedanı olan “Quattroporte BEV”i təqdim edəcək və o, həm də elektrik güc aqreqatı ilə təchiz olunacaq.
© Yeniavaz.com
