COP29 çərçivəsində karbohidrogen yanacağı kimi çox həssas mövzularda vacib müzakirələr aparılır. Dünyada istixana qazlarının təqribən 70 faizi bu sahədə yaranır. Ancaq biz görürük ki, neft-qaz mövzusu lazım olduğundan daha çox vurğulanır. Məsələn, karbon-dioksidin miqdarına baxsaq, burada ilk sırada kömür sektorunun gəldiyini görərik. Halbuki Azərbaycanda mədənlər olsa da, ölkəmiz bundan istifadə etmir.
“İki sahil” xəbər verir ki, bu sözləri jurnalistlərə açıqlamasında COP29-un baş icraçı direktoru Elnur Soltanov söyləyib.
O bildirib ki, neft-qaz məsələsinin daha çox qabardılmasının əsas məqsədi geosiyasi və geoiqtisadi maraqların iqlim müzakirələrinə qarışması ilə bağlıdır. Bu da iqlim müzakirələrini ideolojiləşdirir.
Dünyanın karbohidrogen yanacaqlarından uzaqlaşmasının COP-lar çərçivəsində verilən qərarlar daxilində həyata keçirilməli olduğunu deyən E.Soltanov əlavə edib: “Karbohidrogen yanacaqlarından uzaqlaşma prosesi ədalətli və nizamlı şəkildə aparılmalıdır. Eyni zamanda, təbii qazın keçid yanacağı olaraq rolu vurğulanmalıdır. Çünki elmi modellər göstərir ki, təbii qazın yaşıl keçiddə yolu çox böyükdür”.
