BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının – COP29-un Azərbaycanda keçirilməsi tarixi hadisədir. Azərbaycan növbəti dəfə öz üzərinə düşən vəzifəni uğurla icra etdi. COP29-un qısa zamanda yüksək səviyyədə təşkil edilməsi Azərbaycanın inkişafı və əldə etdiyi nailiyyətlərlə, təcrübələrlə bağlıdır.
Bunu Teleqraf.com-a Milli Məclisin Regional məsələlər komitəsinin sədri, Yeni Azərbaycan Partiyasının (YAP) təmsilçisi Siyavuş Novruzov deyib.
O qeyd edib ki, Prezident İlham Əliyevin rəhbərliyi ilə Azərbaycanda keçirilən bütün tədbirlər kimi COP29-da yüksək səviyyədə təşkil edildi: “Eyni zamanda birinci vitse-prezident Mehriban xanım Əliyevanın təşkilatçılığı ilə görülən yüksək səviyyəli işlər göz önündədir. Bu mənada Azərbaycan cəmi 11 aya COP29-un təşkilinə nail olub. Bundan öncə də Azərbaycan beynəlxalq, mötəbər tədbirlərə ev sahibliyi edib. Avropa Oyunları, İslam Həmrəylik Oyunları, Avroviziya, Türk Dövlətləri Təşkilatının, eyni zamanda Qoşulmama Hərəkatının sədri kimi Azərbaycanın gördüyü işləri nümunə göstərmək olar”.
Millət vəkili bildirib ki, COP29 öz maştabına görə daha böyük beynəlxalq tədbirdir: “200-dən artıq dövlətin razılığı ilə COP29 Azərbaycanda keçirildi. Bu, ölkəmizə olan etimad və inamın bariz nümunəsi idi. Məhz Prezidentin həyata keçirdiyi uğurlu, davamlı siyasətin nəticəsində COP29-un tarixində Azərbaycan ən yüksək təşkilatçılıq xüsusiyyətlərinə görə yadda qalacaq. Bu tədbirin keçirilməsi bir daha Azərbaycanda ictimai-siyasi sabitliyin olduğunu, ölkəmizdə insan hüquq və azadlıqlarının ən yüksək səviyyədə təmin edilməsinə əsaslanır”.
Deputat vurğulayıb ki, Azərbaycan ekologiya və ətraf mühitin qorunmasına xüsusi önəm verir: “Bu istiqamətdə mühüm dövlət proqramları icra edilir. COP29 çərçivəsində həmçinin hüquqları pozulmuş kiçik dövlətlərə yardımların, köməkliklərin edilməsi də gündəmdə oldu. Bu ölkələrin ərazilərində ekoloji tarazlığın pozulmasına yönələn addımlar pislənildi. Həmçinin müasir müstəmləkəçilik anlayışlarının aradan qaldırılması ilə bağlı çağırışlar edildi”.
Siyavuş Novruzov hesab edir ki, bu gün Azərbaycan COP29 kimi mötəbər bir tədbirə ev sahibliyi edir, öz tarixinin həqiqətlərini dünyaya çatdırmağa çalışdığı halda yenə də bəzi qüvvələr öz çirkin niyyətindən əl çəkmir: “Mümkün qədər bu tədbirin üzərinə kölgə salmağa cəhdlər edilir. Fransa, Niderland kimi ölkələr, digər kəşfiyyat qrupları, erməni lobbisi və onun əlaltıları Azərbaycana qarşı qarayaxma kampaniyası aparır. Sözsüz ki, hər zaman olduğu kimi bütün bu çirkin iftiralara baxmayaraq Azərbaycan tarixində mühüm hadisələr yaşanır. Bu, dünya üçün edilən bir təşəbbüsdür. Azərbaycan isə qlobal miqyasda özünün nəyə qadir olduğunu bir daha nümayiş etdirdi”.
