İsrailin Qəzza zolağına hücumları nəticəsində son 24 saat ərzində ən azı 51 fələstinli həlak olub.
Modern.az xəbər verir ki, bu barədə Qətərin “Əl-Cəzirə” telekanalı məlumat yayıb.
Qeyd olunub ki, təkcə Qəzza zolağının mərkəzi hissəsində yerləşən Əl-Buric qaçqın düşərgəsinə endirilən aviazərbənin qurbanlarının sayı 10 nəfərə çatıb.
Şati qaçqın düşərgəsindəki BMT-nin idarə etdiyi Əbu Assi məktəbinə də hücum edilib.
Məktəb 40 gündən çox İsrailin mühasirəsində olan Beyt-Lahiya, Beyt-Hanun və Cəbəliyyə bölgələrindən qaçaraq didərgin düşmüş minlərlə fələstinlinin sığınacağına çevrilib.
Xatırladaq ki, Yaxın Şərqdə vəziyyət 2023-cü ilin 7 oktyabrında Fələstiinin radikal HƏMAS hərəkatının Qəzza sektorundan İsrailə keçərək sərhəd bölgələrindəki yaşayış məntəqələrindəki sakinləri öldürməsi və girov götürməsindən sonra kəskinləşib. İsrail buna cavab olaraq HƏMAS-ın hərbi və siyasi strukturunu məhv etmək və bütün girovların azad olunması məqsədilə Qəzza bölgəsində əməliyyata başlayıb.
