"Bir müddət atəşkəs ola bilər, lakin bu, Yaxın Şərqdə sülh anlamına gəlmir. Ona görə də bu yöndə cəhdlər müəyyən zaman üçün uğurlu olsa da, çox kövrəkdir".
Bunu Qaynarinfo-ya açıqlamasında siyasi şərhçi Rufiz Hafizoğlu Livan və "Hizbullah"ın ABŞ-ın İsraillə atəşkəs təklifinə razılıq verməsi barədə məlumatı şərh edərkən deyib.
"Yaxın Şərqin hər zaman bir əmması olduğu kimi, bu işin də bir əmması var. Atəşkəs haqqında şayiələr dolansa və tərəflər bunu "etiraf” etsələr də, Livanda hərbi əməliyyatlar və ərazilərin bombalanması hələ də davam edir. İsrailin baş naziri də deyib ki, "Hizbullah”la atəşkəs olsa da belə, bu həmin təşkilatla mübarizənin dayandırılması anlamına gəlmir. Digər tərəfdən, bu gün səhər saatlarından etibarən tərəflər bir-birinə qarşı müxtəlif raket zərbələri endiriblər. Yaxın Şərqdə atəşkəsin olması hələ sülh demək deyil. Yaxın günlərdə ABŞ-ın xüsusi nümayəndəsinin səfəri nəticəsində əldə olunan kövrək atəşkəsin nə qədər davamlı olduğu görünəcək. Amma görünən odur ki, tərəflər qarşılıqlı raket atəşlərini dayandırmayıblar", deyə Rufiz Hafizoğlu bildirib.
Həmsöhbətimiz İsrail hökumətinin "Hizbullah”la atəşkəsdə tam olaraq maraqlı olduğunu düşünmür:
"Bu gün İsrailin əldə etdiyi öz maraqlarına uyğun uğurları onun üçün olduqca münbitdir. İsrail HƏMAS və "Hizbullah”ı heç bir zaman olmayan dərəcədə sıx şəkildə küncə sıxıb. ABŞ-da hakimiyyətə qayıdan Trampın İrana qarşı daha sərt mövqe sərgiləməsi də göstərir ki, Təl-Əviv indilikdə atəşkəsdə maraqlı deyil. İsrail Livan ərazisində cəmi 3 km. irəliləyə bilib. Qəzzadakı əməliyyatların alternativini burada həyata keçirmək mümkün deyil. Bir müddət atəşkəs ola bilər. Lakin bu Yaxın Şərqdə sülh anlamına gəlmir. Ona görə də atılan bütün cəhdlər müəyyən zaman üçün uğurlu olsa da, çox kövrəkdir. Nəzərə alaq ki, yaxın aylarda İranda da bəlli ciddi proseslər başlayacaq".
Qeyd edək ki, "Reuters"in məlumatına görə, Livan və "Hizbullah" ABŞ-ın İsraillə atəşkəs təklifi ilə razılaşıb. Bununla belə, məzmunla bağlı bəzi şərhlər edilib. Xüsusilə, Livan parlamenti sədrinin köməkçisi Əli Həsən Xəlil bildirib ki, bazar ertəsi Livan ABŞ-ın Livandakı səfirinə yazılı cavab göndərib və bu arada Ağ Evin xüsusi nümayəndəsi Amos Hokşteyn danışıqları davam etdirmək üçün Beyruta gedir.
"Hizbullah" da öz növbəsində atəşkəslə bağlı danışıqlarda çoxdankı müttəfiqi Livan parlamentinin sədri Nəbih Berrini dəstəkləyib. "Livan sənədlə bağlı öz şərhlərini müsbət atmosferdə təqdim edib. Təqdim etdiyimiz bütün şərhlər 1701 saylı qətnamənin bütün müddəalarla dəqiq yerinə yetirilməsini təsdiqləyir", deyə Xəlil bildirib.
Rüfət Sultan
