Bunu COP29 sammitində milli bəyanatla çıxış edən Hindistanın ətraf mühit, meşə təsərrüfatı və iqlim dəyişikliyi üzrə dövlət naziri Kirti Vardhan Sinq deyib.
"Dayanıqlı inkişafın əsas ehtiyaclarını ödəməyə və yoxsulluğun aradan qaldırılmasına yönəlmiş inkişaf trayektoriyalarımızla bağlı güzəştə getmək olmaz", - o bildirib.
Nazir inkişaf etməkdə olan ölkələrin üzərinə düşən əhəmiyyətli maliyyə yükünə baxmayaraq, Hindistanın iqlim dəyişikliyi ilə mübarizə üçün iddialı tədbirlər görməyə davam etmək əzmini vurğulayıb.
"Hindistan da daxil olmaqla, Qlobal Cənub ölkələri problemə əhəmiyyətli töhfə verməsələr də, biz hələ də iqlim dəyişikliyinin azaldılmasına dair maliyyə xərclərini və iqlim dəyişikliyinin səbəb olduğu itkiləri öz üzərimizə götürürük. Bu, bizim inkişaf ehtiyaclarını ödəmək imkanlarımızı ciddi şəkildə məhdudlaşdırır", - o əlavə edib.
"Hindistanın bərpa olunan enerji potensialı 2014-cü ildən bəri, demək olar ki, üç dəfə artıb və biz 2030-cu ilə qədər 500 GW hədəfinə çatmaq yolundayıq", - o bildirib.
Nazir Hindistanın qurduğu bir sıra beynəlxalq tərəfdaşlıqları, o cümlədən, Beynəlxalq Günəş Enerjisi Alyansı, Fəlakətlərə Dayanıqlılıq İnfrastruktur Koalisiyası, Qlobal Bioyanacaq Alyansı, Resursların Səmərəliliyi və Dairəvi İqtisadiyyat üzrə Sənaye Koalisiyası və digərlərini vurğulayıb.
Sinq qeyd edib ki, bu təşəbbüslər Hindistanın qlobal iqlim həlləri istiqamətində daha geniş səylərinin bir hissəsidir.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir - Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
