Müdafiə naziri Con Hili Böyük Britaniyanın hərbi gücündə ciddi ixtisarların həyata keçiriləcəyini açıqlayıb.
Publika.az xəbər verir ki, ixtisarlar çərçivəsində Birləşmiş Krallıq Hərbi Dəniz Qüvvələrinin iki amfibiya hücum gəmisi, bir freqat və 31 hərbi helikopteri silahlı qüvvələrin inventarından çıxarılacaq.
Hökumət bu qərarın Mühafizəkarların müdafiə büdcəsində buraxdığı iddia edilən 22 milyard funt sterlinqlik kəsirlə bağlı olduğunu bildirib. Con Hili parlamentdəki çıxışında bildirib ki, Leyboristlərə müdafiə sahəsində “çox pis bir miras” qalıb və bu səbəbdən altı köhnəlmiş müdafiə layihəsinin dayandırılması zərurəti yaranıb. Bu addımın qarşıdakı beş il ərzində 500 milyon funt sterlinqə qənaət edəcəyi gözlənilir.
Bildirilib ki, 31 hərbi helikopter də daimi olaraq istifadədən çıxarılacaq. Böyük Britaniyanın yeni helikopter proqramının həyata keçirilməsi isə hələ bir neçə il çəkəcək. Qeyd edək ki, ötən il silahlı qüvvələrin inventarında ümumilikdə 294 helikopter mövcud idi.
