Azərbaycan Mərkəzi Bankının (AMB) əsas prioritetlərindən biri bazar iştirakçılarının hüquqlarının qorunması, bərabər şərtlərin təmin edilməsi və sağlam rəqabət mühitinin yaradılmasıdır.
Fins.az xəbər verir ki, bunu AMB-nin Ödəniş sistemləri və hesablaşmalar departamentinin direktoru Fuad Səbziyev Bakıda keçirilən “Turan E-ticarət və E-İxracat Forumu”nda deyib.
O qeyd edib ki, Mərkəzi Bank, bu istiqamətdə üzərinə düşən öhdəlikləri layiqincə yerinə yetirməyə çalışır və yaxın zamanda bazar iştirakçıları bu səylərin nəticələrini müşahidə edəcəklər. Azərbaycanda 20-dən çox ödəniş xidməti təchizatçısı artıq lisenziya alaraq sistemə qoşulub və fəaliyyətini davam etdirir.
Fuad Səbziyev həmçinin fintexlər və digər ödəniş xidməti təchizatçılarının sistemlərə inteqrasiyasının uğurla həyata keçirildiyini və bu prosesin AMB-nin strateji yanaşmasına uyğun şəkildə icra olunduğunu vurğulayıb. Yeni məhsul və xidmətlərin bazarda təqdim edilməsini təmin etmək məqsədilə Mərkəzi Bank, fintexlərə xüsusi tənzimləmə rejimi tətbiq edib. Bu rejim çərçivəsində, həmçinin yeni təşkilatların sistemə qoşulması və fəaliyyətinin dəstəklənməsi məqsədilə gələcək inkişaf və məhsul çeşidlərinin genişlənməsi təşviq edilir.
Fuad Səbziyev, elektron ticarət və ödəniş əməliyyatları sahəsində beynəlxalq təcrübənin Azərbaycan üçün böyük əhəmiyyət daşıdığını da qeyd edib.
