Bu gün UEFA Avropa Liqasının V turunda Azərbaycanın "Qarabağ" klubu Fransanın "Lion" komandasını qəbul edəcək.
Bəs "Qarabağ" necə bir klubla qarşılaşacaq və qalib gəlmə şansı nə qədərdir?
Bu barədə idman eksperti Ceyhun Rzayev Redaktor.az-a açıqlamasında "Qarabağ"dan uğurlu nəticə gözlədiyini bildirib:
"Nəticə heç-heçə olsa da, bu, yaxşı bir nəticədir. "Lion" çox güclü komandadır. Komandanın futbolçularının dəyəri ümumi götürsək, 240 milyon avrodur, yəni təxminən "Qarabağ"dan 10 dəfə çoxdur. Ona görə də "Qarabağ"ı çox güclü komanda gözləyir. Oyunun necə alınmasından çox şey asılıdır".
"Mən çox inanıram ki, "Qarabağ" bu gün ən yaxşı oyunlarından birini göstərəcək və meydandan xal və ya xallarla ayrılacaq. Sevindirici hal odur ki, "Qarabağ"da ciddi itki yoxdur. Təkcə Bədavi zədəlidir, ona görə mən ümidvaram ki, "Qarabağ" yaxşı nəticə göstərə biləcək", - deyə ekspert qeyd edib.
Qeyd edək ki, qarşılaşma Bakı vaxtı ilə saat 21:45-də Tofiq Bəhrəmov adına stadionda start götürəcək.
Sevinc İBRAHİMZADƏ
