Xalqımızın qeyrətli, mətin oğulları oddan-alovdan keçərək 44 günə əsir Qarabağımızı azad etdilər. Bu haqq savaşında Lənkəranın Yuxarı Nüvədi kəndində boya-başa çatan baş leytenant Vüsal Kamran oğlu Kazımov döyüş meydanında yağıya qarşı son nəfəsinə qədər vuruşub şəhadətə qovuşdu. İndi Lənkəranda böyük də, kiçik də qəhrəman Vüsalla qürur duyur, onun xatirəsini əziz tutmağı özünə müqəddəs borc bilir. Vətən sevdalısının şəhadətə qovuşduğu dördüncü il münasibətilə vaxtı ilə oxuduğu Yuxarı Nüvədi kənd M. Mirzəcanov adına tam orta məktəbində anım tədbiri keçirildi.
Tədbirdə ilk öncə bütün şəhidlərin əziz xatirəsi bir dəqiqəlik sükutla anıldı, Azərbaycan Respublikasının Dövlət Himni oxundu.
Məktəbin direktoru Ramiz Ramazanov çıxış edərək dedi: - Şəhid Vüsal Kazımovun timsalında Vətən uğrunda canından keçən bütün oğulların etdiyi fədakarlıq xalqımız üçün hər şeydən qiymətlidir. Bu gün bizim ən böyük borcumuz 30 il düşmənə əsir düşən Qarabağımızı azadlığa qovuşduran igid Vətən oğullarının xatirəsini yaşatmaq, gələcək nəsillərə ötürməkdir.
Digər natiqlər də öz çıxışlarda 44 günlük Vətən müharibəsində Müzəffər Ali Baş Komandan, Prezident İlham Əliyevin rəhbərliyi ilə şanlı ordumuzun qazandığı tarixi zəfərdən, əsgər və zabitlərin keçdiyi şərəfli döyüş yolundan, şəhid ailələrinə, qazi və müharibə iştirakçılarına göstərilən diqqət və qayğıdan danışdılar.
Tədbirin bədi hissəsində şagirdlər Vətəni, qəhrəmanlığı tərənnüm edən mahnı və şerlər oxudular.
Qeyd edək ki, Vüsal Kazımov Vətən müharibəsində Füzuli əməliyyatında, Cəbrayıl döyüşlərdə, Xocavəndın, Şuşanın azadlığı uğrunda böyük şücaət göstərib. Sonuncu dəfə 26 oktyabrda ailəsi ilə əlaqə saxlayıb. Şuşada gedən ağır vuruşların birində həlak olub. 29 noyabr 2020-ci il tarixində Lənkəran rayonu Yuxarı Nüvədi kəndində böyük izdihamla yolunda can qoyduğu torpağa tapşırılıb. Ölümündən sonra 3-cü dərəcəli “Vətənə xidmətə görə” ordeni, “Vətən uğrunda”, ”, “İgidliyə görə”, Xocavəndin və Füzulinin azadlığı uğrunda medalları ilə təltif olunub.
Bəli, Vətən, torpaq yolunda canından keçərək şəhidlik zirvəsinə ucalmaq ən böyük şərəfdir. Bu zirvə sahibləri əbədi bir ömür qazanırlar. Şəhid Vüsal Kazımov kimi...
Zəfər Orucoğlu,
Azərbaycan Jurnalistlər Birliyinin üzvü
